കോട്ടയം: ട്രെയിൻ ഓടിത്തുടങ്ങിയപ്പോൾ ചാടിക്കയറിയ ടിടിഇ പ്ലാറ്റ്ഫോമിൽ വീണു. പ്ലാറ്റ്ഫോമിന്റെയും ബോഗിയുടെ ചവിട്ടുപടിയുടെയും ഇടയിൽപ്പെട്ട് കാലിനു പരിക്കേറ്റ ടിടിഇയെ കോട്ടയത്തെ സ്വകാര്യ ആശുപത്രിയിൽ പ്രവേശിപ്പിച്ചു. ചെന്നൈ മെയിലിലെ ടിടിആർ കൊല്ലം സ്വദേശി ജാഫർ ഹുസൈൻ (39) ആണ് പരിക്കേറ്റത്.
കോട്ടയം റെയിൽവേ സ്റ്റേഷനിൽ ഇന്നലെ വൈകുന്നേരം 6.30നായിരുന്നു സംഭവം. തിരുവനന്തപുരത്തുനിന്ന് എത്തിയ ചെന്നൈ മെയിൽ കോട്ടയം റെയിൽവേ സ്റ്റേഷനിൽനിന്നു യാത്ര തുടങ്ങിയപ്പോഴാണ് ടിടിഇ ഓടിക്കയറിയത്. കൈവശമുണ്ടായിരുന്ന റിസർവേഷൻ ചാർട്ട് അടക്കമുള്ള സാധനങ്ങൾ പ്ലാറ്റ്ഫോമിലേക്ക് വീണു. ട്രെയിൻ പെട്ടെന്ന് നിർത്തിയതിനാൽ വൻ അപകടം ഒഴിവായി.
