Set us Home Page

കാത്ത് കാത്തിരുന്നെടുത്ത സെല്‍ഫി ! രണ്‍വീറിനൊപ്പം സെല്‍ഫിയെടുക്കാന്‍ മലയാളി നടിയ്ക്ക് കാത്തിരിക്കേണ്ടി വന്നത് മണിക്കൂറുകള്‍; സംഭവം ഇങ്ങനെ…

ഇഷ്ടതാരത്തിനൊപ്പം ഒരു സെല്‍ഫി ഏതൊരു ആരാധികന്റെയോ ആരാധികയുടെയും അഭിലാഷമാണ്. മണിക്കൂറുകള്‍ കാത്തു നിന്നെങ്കിലും ആ ഒരു ആഗ്രഹം സാധിച്ചതിന്റെ സന്തോഷത്തിലാണ് മലയാളി നടിയും മോഡലുമായ ശ്വേത വിനോദ്. തന്റെ പ്രിയനടന്‍ രണ്‍വീര്‍ സിങ്ങിനൊപ്പമുള്ള ചിത്രം ഒരു ചെറുകുറിപ്പിനൊപ്പം ശ്വേത കുറച്ചു ദിവസങ്ങള്‍ക്കു മുമ്പ് ഫേസ്ബുക്കില്‍ പങ്കുവച്ചിരുന്നു.

ക്രിക്കറ്റ് ഇതിഹാസം കപില്‍ദേവായി രണ്‍വീര്‍ സിങ് എത്തുന്ന ഏറ്റവും പുതിയ ചിത്രം 83-യില്‍ ശ്വേതയും ഒരു പ്രധാന കഥാപാത്രമായി അഭിനയിക്കുന്നുണ്ട്. 83യുടെ ചിത്രീകരണത്തിനിടയില്‍ മണിക്കൂറുകളോളം കാത്തുനിന്ന് അദ്ദേഹത്തോടൊപ്പം ഒരു സെല്‍ഫിയെടുക്കാനായതിന്റെ സന്തോഷം ഫെയ്‌സ്ബുക്ക് കുറുപ്പില്‍ ശ്വേത പങ്കുവയ്ക്കുന്നു… ‘എനിക്കിനി സമാധാനത്തോടെ മരിക്കാം. എന്റെ ജീവിതത്തിലെ ഏറ്റവും നല്ല നിമിഷം.. ഇദ്ദേഹത്തെ കാണുക എന്നതും ഒപ്പം നിന്ന് ഫോട്ടോ എടുക്കാന്‍ സാധിച്ചതും.. എന്നാല്‍ അദ്ദേഹത്തോടൊപ്പം ജോലി ചെയ്യാന്‍ പോകുന്നുവെന്നതിന്റെ സന്തോഷം എനിക്ക് വിവരിക്കാനാകുന്നില്ല.. ഞാന്‍ നിങ്ങളുടെ കടുത്ത ആരാധികയാണ്… രണ്‍വീര്‍.. നല്ല മനുഷ്യനാണ് നിങ്ങള്‍…ഇതിന് ഒരുപാട് നന്ദി… ഈ ഫോട്ടോ ഞാനെന്റെ ജീവനെപ്പോലെ സൂക്ഷിക്കും…’ ചിത്രത്തിനൊപ്പം ശ്വേത കുറിച്ചു.

സെല്‍ഫിക്കായി മണിക്കൂറുകളോളം കാത്തുനിന്നതും ശ്വേത വിവരിക്കുന്നു. പുലര്‍ച്ചെ നാലേമുക്കാലിന് ഷൂട്ട് തീര്‍ന്ന് രണ്‍വീര്‍ വസ്ത്രം മാറുവാനായി പോയി. രണ്‍വീര്‍ മേക്കപ്പും കോസ്റ്റ്യൂമും മാറ്റി വരുന്നതുവരെ ശ്വേത കാത്തുനിന്നു. പക്ഷേ, കോസ്റ്റ്യൂം മാറി രണ്‍വീര്‍ പുറത്തെത്തിയ സമയത്ത് സംവിധായകന്‍ ശ്വേതയെ വിളിച്ചു. രണ്‍വീര്‍ അപ്പോഴേക്കും മുറിയില്‍ നിന്നു പുറത്തേക്കും പോയി. ശ്വേത ഹൃദയം തകര്‍ന്നു നില്‍ക്കുമ്പോള്‍, എല്ലാവരും ശ്വേതയെ നോക്കി കൈവീശി കാണിക്കുകയും വിളിക്കുകയും ചെയ്യുകയായിരുന്നു.

നോക്കുമ്പോള്‍ രണ്‍വീര്‍ ശ്വേതയെ കാത്തു നില്‍ക്കുന്നു. ഷൂട്ടിനിടയില്‍ പല തവണ കൂടെ നിന്ന് ഒരു സെല്‍ഫിയെടുക്കണമെന്ന ആഗ്രഹം ശ്വേത പ്രകടിപ്പിച്ചിരുന്നു. പുലര്‍ച്ചെ തുടങ്ങിയ ഷൂട്ട് തീര്‍ന്നു വളരെയധികം ക്ഷീണിതനായിട്ടും തനിക്കു കൂടെ നിന്നൊരു ഫോട്ടോ എടുക്കാന്‍ വേണ്ടി കാത്തു നിന്ന രണ്‍വീറിനെ കണ്ട് താന്‍ ആവേശഭരിതയായെന്നും ശ്വേത പറയുന്നു. ഇര, മേരേ പ്യാരി ദേശ്വാസിയോം, ഇക്കയുടെ ശകടം, മായാനദി, ഒരു സിനിമാക്കാരന്‍ തുടങ്ങിയ ചിത്രങ്ങളിലൂടെ ശ്രദ്ധിക്കപ്പെട്ട നടിയാണ് ശ്വേത വിനോദ്. ഇന്ത്യയുടെ ആദ്യ ലോകകപ്പ് ക്രിക്കറ്റ് വിജയത്തിന്റെ കഥ പറയുന്ന ’83’ കബീര്‍ ഖാനാണ് സംവിധാനം ചെയ്യുന്നത്. കപിലായി രണ്‍വീര്‍ എത്തുമ്പോള്‍ ചിത്രത്തില്‍ കപിലിന്റെ ഭാര്യ റോമി ദേവിന്റെ വേഷത്തിലെത്തുന്നത് ദീപിക പദുക്കോണ്‍ ആണ്.

രാഷ്ട്രദീപിക വാര്‍ത്തകള്‍ ഫേസ്ബുക്കില്‍ പിന്തുടരാന്‍ ഞങ്ങളുടെ പേജ് ലൈക്ക് ചെയ്യൂ...

https://www.facebook.com/RashtraDeepika/

LATEST NEWS