രണ്ട് വയസുള്ള കുഞ്ഞുമായി ബിഹാറിൽ നിന്ന് ബംഗളൂരുവിലേക്ക് ട്രെയിനിൽ യാത്ര ചെയ്ത അമ്മയ്ക്ക് തുണയായി ഇന്ത്യൻ റെയിൽവേയിലെ പാന്‍ററി ജീവനക്കാരുടെ കരുതൽ. ട്രെയിൻ യാത്രയ്ക്കിടയിൽ കുഞ്ഞിനായി കൊണ്ടുവന്ന ഓട്സ് തയ്യാറാക്കി നൽകാൻ സഹായിച്ച ജീവനക്കാരെ പ്രശംസിച്ച് അമ്മ സോഷ്യൽ മീഡിയയിൽ പങ്കുവെച്ച കുറിപ്പ് ശ്രദ്ധ നേടുന്നു.
‘Dakshnmom’ എന്ന ഇൻസ്റ്റാഗ്രാം ഹാൻഡിലിലൂടെയാണ് ഈ യാത്രാനുഭവം പങ്കുവെച്ചിരിക്കുന്നത്. രണ്ട് രാത്രി നീണ്ട ദീർഘദൂര യാത്രയ്ക്കനിടയിൽ പുറത്തുനിന്നുള്ള ഭക്ഷണത്തിന് പകരം കുഞ്ഞിന് രാത്രി ഓട്സ് നൽകാനാണ് അമ്മ തീരുമാനിച്ചത്. തുടർന്ന് ട്രെയിനിലെ
പാന്‍ററി ജീവനക്കാരെ സമീപിച്ച് കൈയ്യിലുണ്ടായിരുന്ന ഓട്സ് പാക്കറ്റ് നൽകി അത് ഉണ്ടാക്കി തരാൻ സാധിക്കുമോ എന്ന് ചോദിക്കുകയായിരുന്നു.
“സാധിക്കുമോ എന്ന് മടിയോടെയാണ് ചോദിച്ചതെങ്കിലും ജീവനക്കാർ വളരെ സന്തോഷത്തോടെ അത് സ്വീകരിച്ചു. വെറും 5 മിനിറ്റിനുള്ളിൽ ചൂടുള്ള ഓട്സ് തയ്യാറാക്കി അവർ എനിക്ക് നൽകി, ഇങ്ങനെയാണ് യാത്രക്കാരിയായ അമ്മ ഇന്‍സ്റ്റാഗ്രാം വീഡിയോയിൽ കുറിച്ചത്.
ആവശ്യപ്പെട്ട ഭക്ഷണം വേഗത്തിൽ ഉണ്ടാക്കി നൽകിയതിനേക്കാൾ ജീവനക്കാരുടെ സഹകരണമനോഭാവവും അനുകമ്പയുമാണ് തന്നിൽ വലിയ സന്തോഷമുണ്ടാക്കിയതെന്ന് അമ്മ കൂട്ടിച്ചേർത്തു. സോഷ്യൽ മീഡിയയിൽ പങ്കുവെച്ച വീഡിയോയ്ക്ക് താഴെ നിരവധിയാളുകളാണ് റെയിൽവേ ജീവനക്കാരുടെ ഈ സൻമനസിനെ പ്രശംസിച്ച് രംഗത്തെത്തുന്നത്.
