മഴക്കാലത്തെ ഇരുചക്രവാഹന യാത്രകൾ എത്രത്തോളം അപകടകരമാണെന്ന് വ്യക്തമാക്കുന്ന ഒരു വീഡിയോയാണ് സമൂഹ മാധ്യമങ്ങളിൽ വൈറലാകുന്നത്. പശ്ചിമ ബംഗാളിലെ പ്രശസ്തമായ കുർസിയോങ് വ്യൂ പോയിന്റിന് സമീപം നടന്ന ഞെട്ടിക്കുന്ന അപകടത്തിന്റെ ദൃശ്യങ്ങളാണ് പുറത്തുവന്നത്.
മഴയത്ത് ഈറനണിഞ്ഞ റോഡിലൂടെ ഉയർന്ന വേഗതയിൽ വന്ന ബൈക്ക് പെട്ടെന്ന് നിയന്ത്രണം വിട്ട് റോഡരികിലെ പാറക്കല്ലിലും അതിരടയാളക്കല്ലിലും ശക്തമായി ഇടിക്കുകയായിരുന്നു. ആഘാതത്തിൽ റൈഡർ റോഡിലേക്ക് തെറിച്ചുവീഴുകയും ചെരിപ്പുകൾ കാറ്റിൽ പറന്നുപോവുകയും ചെയ്തു. ബൈക്ക് റോഡരികിലെ താഴ്ചയിലേക്ക് മറിയുകയും ചെയ്തു.
ഇത്രയും വലിയ അപകടമായിരുന്നിട്ടും അതിർത്തിക്കല്ലിൽ തട്ടി റോഡിലേക്ക് തന്നെ വീണതിനാൽ താഴ്ചയുള്ള മലയിടുക്കിലേക്ക് വീഴാതെ റൈഡർ അതി അത്ഭുതകരമായി രക്ഷപ്പെടുകയായിരുന്നു. ഡിജിറ്റൽ ക്രിയേറ്ററായ ബപ്പി ബർമൻ ഇൻസ്റ്റാഗ്രാമിൽ പങ്കുവെച്ച ഈ വീഡിയോ ഇതിനോടകം അഞ്ച് ലക്ഷത്തിലധികം ആളുകളാണ് കണ്ടത്.
മഴക്കാലത്ത് പ്രത്യേകിച്ച് വളവുകളും താഴ്ചകളുമുള്ള മലയോര പാതകളിൽ വേഗത കുറച്ച് ശ്രദ്ധയോടെ വണ്ടി ഓടിക്കണമെന്ന് നിരവധി ആളുകൾ കമന്റുകളിൽ ഓർമിപ്പിച്ചു.
