കുതിരാൻ: തൃശൂർ-പാലക്കാട് ദേശീയപാതയിൽ കുതിരാൻ ക്ഷേത്രത്തിനുസമീപം കാറിന് തീപിടിച്ചു. യാത്രക്കാർ രക്ഷപ്പെട്ടു. ഇതേ തുടർന്ന് ദേശീയപാതയിൽ രാവിലെ ഒരുമണിക്കൂറോളം ഗതാഗതം സ്തംഭിച്ചു. ഇന്നുരാവിലെ എട്ടിനായിരുന്നു സംഭവം. എറണാകുളത്തുനിന്നും ബംഗളൂരുവിലേക്ക് പോയിരുന്ന കാറിനാണ് തീപിടിച്ചത്. ഡ്രൈവറും ദന്പതികളുമാണ് കാറിലുണ്ടായിരുന്നത്.
കുതിരാൻ ക്ഷേത്രത്തിൽ നേർച്ചയിട്ട് പിന്നീട് കാർ സ്റ്റാർട്ട് ചെയ്തപ്പോൾ പുക വരുന്നതുകണ്ട് ഡ്രൈവറും ദന്പതികളും കാറിൽനിന്നും ചാടിയിറങ്ങി. ഇതിനാൽ ആളപായം ഒഴിവായി. പൂർണമായും കത്തിനശിച്ച കാറിലുണ്ടായിരുന്ന വിലപ്പെട്ട രേഖകളും അഗ്നിക്കിരയായി.
ഫയർഫോഴ്സും ഹൈവേ പോലീസും മറ്റു വാഹനങ്ങളിലെ യാത്രക്കാരും രക്ഷാപ്രവർത്തനത്തിൽ പങ്കാളികളായി. ഷോർട്ട് സർക്യൂട്ടാണ് തീപിടിത്തത്തിന് കാരണമെന്നാണ് പ്രാഥമിക നിഗമനം. പീച്ചി പോലീസ് സ്ഥലത്തെത്തി മേൽനടപടി സ്വീകരിച്ചു.