പാമ്പാടി: യുവാവിനെ വീട്ടില്‍ കയറി ആക്രമിച്ച കേസില്‍ നാലു പേരെ പോലീസ് അറസ്റ്റ് ചെയ്തു. പുതുപ്പള്ളി കൈതേപ്പാലം എട്ടുമാണിക്കടവ് മേലോട്ടുപറമ്പില്‍ കൊച്ചുമോന് (40), പുതുപ്പള്ളി കൈതേപ്പാലം എട്ടുമാണിക്കടവ് അയ്യകുന്നേല്‍ സുജിത്ത് സുമോദ് (28), പുതുപ്പള്ളി കൈതേപ്പാലം എട്ടുമാണിക്കടവ് സരോവരം കെ. ബിജു (44), കോട്ടയം വേളൂര്‍ ചാത്തംപടത്തില്‍ ആദര്‍ശ് (28) എന്നിവരെയാണ് പാമ്പാടി പോലീസ് അറസ്റ്റ് ചെയ്തത്.
ഇവര്‍ സംഘം ചേര്‍ന്നു കഴിഞ്ഞ ദിവസം രാത്രി പാമ്പാടി കുന്നേല്‍പാലത്തു വാടകയ്ക്കു താമസിക്കുന്ന യുവാവിനെ വീട്ടില്‍ കയറി ആക്രമിക്കുകയായിരുന്നു.
രാത്രിയില്‍ വീട്ടില്‍ അതിക്രമിച്ചു കയറിയ ഇവര്‍ യുവാവിനെ മര്‍ദിക്കുകയും കരിങ്കല്ലുകൊണ്ട് ആക്രമിക്കുകയുമായിരുന്നു. പണം കടം വാങ്ങിയതുമായി ബന്ധപ്പെട്ട് കൊച്ചുമോന് യുവാവിനോടു വിരോധം നിലനിന്നിരുന്നു.
ഇതിന്‍റെ തുടര്‍ച്ചയെന്നോണമാണ് ഇയാളും സുഹൃത്തുക്കളും ആക്രമണം നടത്തിയത്. കോടതിയില്‍ ഹാജരാക്കിയ നാലു പേരെയും റിമാന്‍ഡ് ചെയ്തു.
