പാന്‍ ഇന്ത്യന്‍ സൂപ്പര്‍സ്റ്റാര്‍ എന്ന് വിശേഷണമുള്ള നടനാണ് ദുല്‍ഖര്‍ സല്‍മാന്‍. താരത്തിന്റെ അടുത്തിടെ പുറത്തിറങ്ങിയ സീതാരാമം അടക്കമുള്ള ചിത്രങ്ങള്‍ ഇന്ത്യയൊട്ടാകെ ആഘോഷിക്കപ്പെട്ടിരുന്നു.
അതിനാല്‍ തന്നെ താരത്തോടൊപ്പം ബിഗ് സക്രീനില്‍ പ്രത്യക്ഷപ്പെടാന്‍ മുന്‍നിര താരങ്ങളടക്കം പല സന്ദര്‍ഭങ്ങളില്‍ ആഗ്രഹം പ്രകടിപ്പിച്ച് രംഗത്തെത്തിയിരുന്നു.
എന്നാല്‍ താരത്തോടൊപ്പം സിനിമയില്‍ അഭിനയിക്കാന്‍ തനിക്ക് ആഗ്രഹമുണ്ടെന്ന് അറിയിച്ച് യുവജനകമ്മീഷന്‍ മുന്‍ ചെയര്‍പേഴ്‌സണ്‍ ചിന്താ ജെറോമും ഇപ്പോള്‍ രംഗത്തെത്തിയിരിക്കുകയാണ്.
ദുല്‍ഖറിനോടൊപ്പം ഒരേ സിനിമയില്‍ അഭിനയിക്കണമെന്നത് മാത്രമാണ് തന്റെ ആഗ്രഹമെന്നും നായിക ആകണമെന്ന ഉദ്ദേശ്യമില്ലെന്നും ചിന്ത പറഞ്ഞു.
സ്വകാര്യ ചാനലിന് നല്‍കിയ അഭിമുഖത്തിലായിരുന്നു ചിന്ത മനസ് തുറന്നത്. സണ്ണിവെയ്‌നുമായി തനിക്ക് നല്ല സൗഹൃദബന്ധമാണുള്ളത്. സണ്ണിയുടെ അടുത്ത ഫ്രണ്ടാണല്ലോ ദുല്‍ഖര്‍.
ആ വഴിയ്ക്കും എളുപ്പമാണ് ചിന്ത പറഞ്ഞു. മമ്മൂട്ടിയെ നേരിട്ട് കണ്ടിട്ടുണ്ടെങ്കിലും ദുല്‍ഖറിനെ ഇതുവരെ കണ്ടുമുട്ടാന്‍ സാധിച്ചിട്ടില്ലെന്നും ചിന്ത അഭിമുഖത്തില്‍ പറഞ്ഞു.
അതേസമയം കിംഗ് ഓഫ് കൊത്തയുടെ മെഗാ ടീസര്‍ തരംഗമായതിനു പിന്നാലെ മുന്‍ റെക്കോര്‍ഡുകള്‍ പഴങ്കഥ ആക്കി മാറ്റുകയാണ് ദുല്‍ഖര്‍ സല്‍മാന്‍.
12 മില്ല്യണ്‍ കാഴ്ചക്കാരെയാണ് അഭിലാഷ് ജോഷിയുടെ സംവിധാനത്തിലൊരുങ്ങുന്ന ചിത്രത്തിന്റെ ടീസര്‍ ഇത് വരെ നേടിയത്. വന്‍താര നിരയാണ് ചിത്രത്തില്‍ അണിനിരക്കുന്നത്.
