റാന്നി: പിതാവിനെ കടത്തിണ്ണയില്‍ മരിച്ച നിലയില്‍ കണ്ടെത്തിയതിനേത്തുടര്‍ന്ന് മകള്‍ വീടിനുള്ളില്‍ തൂങ്ങിമരിച്ചു. റാന്നി വലിയകലുങ്ക് പുല്ലാട് ഗോവിന്ദനെയാണ് (70) വ്യാഴാഴ്ച വൈകുന്നേരം നാലോടെ റാന്നി അങ്ങാടി ഭാഗത്തെ കടത്തിണ്ണയില്‍ മരിച്ച നിലയില്‍ കണ്ടെത്തിയത്.
പോലീസ് നടപടികള്‍ക്കുശേഷം പത്തനംതിട്ട ജനറല്‍ ആശുപത്രിയില്‍ പോസ്റ്റുമോര്‍ട്ടം നടത്തി ഗോവിന്ദന്‍റെ മൃതദേഹം വീട്ടില്‍ സംസ്കരിച്ചതിനു ശേഷമാണ് മകള്‍ രശ്മിയെ (45) വീട്ടിനുള്ളില്‍ തൂങ്ങിമരിച്ച നിലയില്‍ കണ്ടെത്തിയത്. നാലുസെന്‍റ് കോളനി പള്ളോലില്‍ മോഹനന്‍റെ ഭാര്യയാണ് രശ്മി.
ഇവരുടെ മൃതദേഹം കോട്ടയം മെഡിക്കല്‍ കോളജില്‍ പോസ്റ്റുമോര്‍ട്ടത്തിനുശേഷം ബന്ധുക്കള്‍ക്കു വിട്ടുനല്കി. രശ്മിയുടെ സംസ്കാരം പിന്നീട്.രശ്മിയെ കൂടാതെ മൂന്ന് ആണ്‍മക്കളുമുള്ള ഗോവിന്ദന്‍ ഭാര്യ മരിച്ചതോടെ നോക്കാനാളില്ലാതെ വീട്ടില്‍ നിന്നു ഇറങ്ങിപോകുകയായിരുന്നെന്നു പോലീസ് പറഞ്ഞു.
