കുടുംബപ്രശ്‌നങ്ങളെത്തുടര്‍ന്ന് ഭര്‍ത്താവുമായി തെറ്റിയ യുവതി ചെയ്ത പ്രവൃത്തികള്‍ നാടിനെ ഞെട്ടിച്ചു. ഭര്‍ത്താവിനോടുള്ള ദേഷ്യത്തിന്റെ പുറത്ത് മദ്യപിച്ച് ലക്കുകെട്ട ഇവര്‍ മൂന്നുമാസം പ്രായമായ കുഞ്ഞിനെയുമെടുത്ത് പുറത്തേക്കു പോവുകയായിരുന്നു. കര്‍ണ്ണാടക ഹുബ്ലിയിലെ ദേവി എന്ന 26കാരിയെയാണ് മദ്യലഹരിയില്‍ കുഞ്ഞുമായി കുറ്റിക്കാട്ടില്‍ നിന്നു കണ്ടെത്തിയത്. ഇവരെ പിന്നീട് ബദിയടുക്ക പോലീസ് മഹിളാ മന്ദിരത്തിലേക്ക് മാറ്റി. ഇക്കഴിഞ്ഞ വെള്ളിയാഴ്ച രാത്രി ഒമ്പതരയോടെയാണ് പോലീസിനെ വട്ടം കറക്കിയ സംഭവങ്ങള്‍ ഉണ്ടായത്.
ഭര്‍ത്താവുമായി പിണങ്ങിയ ദേവിയെ കൈക്കുഞ്ഞുമായി വെള്ളിയാഴ്ച രാത്രിയോടെ ബേള ചൗക്കറില്‍ റോഡ് അരികിലെ കുറ്റിക്കാട്ടില്‍ മദ്യലഹരിയില്‍ കണ്ടെത്തുകയായിരുന്നു. കുഞ്ഞിന്റെ ശബ്ദം കേട്ട് എത്തിയ നാട്ടുകാരാണ് ആദ്യം സംഭവം കണ്ടത്. 26 വയസ് മാത്രം പ്രായമുള്ള യുവതി മദ്യ ലഹരിയില്‍ വീണ് കിടക്കുകയും സമീപത്ത് മൂന്ന് മാസം പ്രായമുള്ള കുഞ്ഞിനെ നാട്ടുകാര്‍ കണ്ടെത്തുകയും ചെയ്തു. തുടര്‍ന്ന് നാട്ടുകാര്‍ പോലീസിനെ വിവരം അറിയിക്കുകയായിരുന്നു.
പോലീസ് എത്തി മദ്യ ലഹരിയില്‍ ലക്കുകെട്ട ദേവിയെയും കുഞ്ഞിനെയും വനിത പോലീസിന്റെ സഹായത്തോടെ കാസര്‍കോട് ജനറല്‍ ആശുപത്രിയില്‍ പ്രവേശിപ്പിച്ചു. ചികിത്സയ്ക്ക് ശേഷമാണ് യുവതിക്ക് സ്വബോധം തിരികെ ലഭിച്ചത്. പിന്നീട് യുവതിയെ മഹിള മന്ദിരത്തിലേക്കും കുഞ്ഞി ചൈല്‍ഡ് ലൈന്‍ പ്രവര്‍ത്തകരെ ഏല്‍പ്പിക്കാനുമായിരുന്നു പോലീസ് തീരുമാനിച്ചത്. എന്നാല്‍ കുഞ്ഞിനെ തന്റെയൊപ്പം മഹിളാമന്ദിരത്തിലേക്ക് അയക്കണമെന്ന് യുവതി വാശി പിടിക്കുകയായിരുന്നു. ഇതോടെ അമ്മയെയും കുഞ്ഞിനെയും മഹിള മന്ദിരത്തില്‍ പാര്‍പ്പിക്കുകയായിരുന്നുവെന്നും പോലീസ് പറഞ്ഞു.
