ലണ്ടൻ: ഇംഗ്ലീഷ് പ്രീമിയർ ലീഗിൽ എവർട്ടനെതിരായ മത്സരത്തിനിടെ ഗുരുതരമായി പരിക്കേറ്റ ചെൽസി ഗോൾകീപ്പർ എമി മാർട്ടിനസ് അടിയന്തര ശസ്ത്രക്രിയയ്ക്ക് വിധേയനായി. എവർട്ടൻ പ്രതിരോധ താരം ജാറഡ് ബ്രാത്ത്‌വെയ്റ്റുമായി കൂട്ടിയിടിച്ചാണ് മാർട്ടിനസിന്‍റെ താടിയെല്ലിന് പരിക്കേറ്റത്. മത്സരത്തിനിടെ ഗ്രൗണ്ടിൽ പ്രാഥമിക ശുശ്രൂഷ നൽകിയശേഷം സ്ട്രെച്ചറിലാണ് 34-കാരനായ താരത്തെ പുറത്തേക്ക് കൊണ്ടുപോയത്.
തുടർന്ന് അടിയന്തരമായി ആശുപത്രിയിൽ പ്രവേശിപ്പിച്ച മാർട്ടിനസിന് ശസ്ത്രക്രിയ നടത്തി. ശസ്ത്രക്രിയ വിജയകരമായി പൂർത്തിയായതായി താരം സമൂഹമാധ്യമങ്ങളിലൂടെ അറിയിച്ചു. സന്ദേശങ്ങൾ അയച്ച എല്ലാവർക്കും നന്ദി അറിയിച്ച മാർട്ടിനസ്, ഏതാനും ആഴ്ചകൾക്കുള്ളിൽ കളിക്കളത്തിലേക്ക് തിരിച്ചെത്താനാകുമെന്ന പ്രതീക്ഷയും പങ്കുവച്ചു. ചെൽസി മത്സരം വിജയിച്ചതും ക്ലീൻ ഷീറ്റ് നിലനിർത്തിയതുമാണ് ഏറ്റവും പ്രധാനമെന്നും താരം കുറിച്ചു.
ഹിൽ ഡിക്കിൻസൺ സ്റ്റേഡിയത്തിൽ നടന്ന മത്സരത്തിൽ പെഡ്രോ നെറ്റോയുടെ ഇരട്ട ഗോളുകളുടെ മികവിൽ ചെൽസി എതിരില്ലാത്ത രണ്ട് ഗോളുകൾക്ക് എവർട്ടനെ പരാജയപ്പെടുത്തി. രണ്ടാം പകുതിയിൽ കിർണൻ ഡ്യൂസ്ബറി-ഹാളിന്‍റെ ഫ്രീകിക്ക് തടയാനുള്ള ശ്രമത്തിനിടെയാണ് മാർട്ടിനസും ബ്രാത്ത്‌വെയ്റ്റും കൂട്ടിയിടിച്ചത്.
