ചങ്ങനാശേരി: നെല്‍കര്‍ഷകരുടെ ദുരിതങ്ങള്‍ സംസ്ഥാന മന്ത്രിമാരുടെ സാന്നിധ്യത്തില്‍ അവതരിപ്പിക്കുകയും അതിനു പരിഹാരം കാണണമെന്ന് ആര്‍ജവത്തോടെ ആവശ്യപ്പെടുകയും ചെയ്ത പ്രമുഖ ചലചിത്ര താരം ജയസൂര്യയ്ക്കും അദ്ദേഹത്തിന്‍റെ സുഹൃത്തും കര്‍ഷകനും സിനിമാതാരവും നെല്‍കര്‍ഷക സംരക്ഷണ സമിതി നിര്‍വാഹക സമതി അംഗവുമായ കൃഷ്ണപ്രസാദിനും നെല്‍കര്‍ഷക സംരക്ഷണ സമിതി സംസ്ഥാന കമ്മറ്റി ഐക്യദാര്‍ഢ്യം പ്രഖ്യാപിച്ചു.
പെരുന്നയില്‍ നടന്ന ഐക്യദാര്‍ഢ്യ സമ്മേളനം സമിതി രക്ഷാധികാരി വി.ജെ. ലാലി ഉദ്ഘാടനം ചെയ്തു.
സത്യം വിളിച്ചു പറഞ്ഞതിന്‍റെ പേരില്‍ ബഹുമാന്യരായ കലാകാരന്മാരെ കടന്നാക്രമിക്കുന്ന നടപടിയില്‍ നിന്നു പിന്തിരിയണമെന്നും അവര്‍ ചൂണ്ടികാണിച്ച പ്രശ്‌നങ്ങള്‍ക്കു സര്‍ക്കാര്‍ പരിഹാരം കാണാന്‍ ശ്രമിക്കണമെന്നും അദ്ദേഹം അഭ്യര്‍ഥിച്ചു.
കോര്‍ഡിനേറ്റര്‍ ജോസ് കാവനാട് കൃഷ്ണപ്രസാദിനെ ആദരിച്ചു. സംസ്ഥാന പ്രസിഡന്‍റ് റജീന അഷറഫ് കാഞ്ഞിരം അധ്യക്ഷത വഹിച്ചു. ജനറല്‍ സെക്രട്ടറി സോണിച്ചന്‍ പുളിങ്കുന്ന് മുഖ്യപ്രഭാഷണം നടത്തി.
വര്‍ക്കിംഗ് പ്രസിഡന്‍റ് പി.ആര്‍. സതീശന്‍, ലാലിച്ചന്‍ പുള്ളിവാതുക്കല്‍, വേലായുധന്‍ പിള്ള, എ.ജെ. അജയന്‍, അനിയന്‍കുഞ്ഞ്, ജയന്‍ ജോസഫ്, റോയി ഊരാംവേലി, സെക്രട്ടറിമാരായ മാത്യൂസ് കോട്ടയം, അഷറഫ്, കറിയാച്ചന്‍ ചേന്നങ്കര തുടങ്ങിയവര്‍ പ്രസംഗിച്ചു.
