ജർമനിയിൽ ആറ് വർഷം താമസിച്ച ശേഷം ഇന്ത്യയിലേക്ക് തിരിച്ചുവരാനുള്ള കാരണം വെളിപ്പെടുത്തികൊണ്ടുള്ള ബംഗളൂരു ടെക് ജീവനക്കാരന്റെ പോസ്റ്റ് സോഷ്യൽ മീഡിയയിൽ വലിയ ചർച്ചകൾക്കാണ് തുടക്കമിട്ടിരിക്കുന്നത്.
ബംഗളൂരു സ്വദേശിയായ തനൂജ് എന്ന യുവാവാണ് സോഷ്യൽ മീഡിയയിൽ പോസ്റ്റ് ചെയ്തിരിക്കുന്നത്. വൃത്തിയുള്ള റോഡുകൾ, മികച്ച തൊഴിൽ ജീവിത സന്തുലിതാവസ്ഥ, സമാധാനപരമായ ചുറ്റുപാടുകൾ, കൃത്യമായ സംവിധാനങ്ങൾ എന്നിവ ജർമനി വാഗ്ദാനം ചെയ്യുന്നുണ്ടെങ്കിലും താൻ ഇന്ത്യയെയാണ് തെരഞ്ഞടുക്കുന്നത് എന്നാണ് അദ്ദേഹം എക്സിൽ കുറിച്ചത്.
ഇന്ത്യയിലെ ട്രാഫിക്, മലിനീകരണം, ബഹളം, തിരക്ക് എന്നിവയെല്ലാം നിലനിൽക്കുമ്പോൾ തന്നെ, ഇവിടെ അനുഭവപ്പെടുന്ന ഊർജ്ജവും വികാരങ്ങളും കുടുംബബന്ധങ്ങളും ആഘോഷങ്ങളും മറ്റൊരിടത്തും ലഭിക്കില്ലെന്നാണ് അദേഹം ചൂണ്ടികാട്ടുന്നത്. ജീവിതം നമുക്ക് ചുറ്റും സജീവമായി നടക്കുന്നു എന്ന ആ തോന്നലാണ് ഇന്ത്യയെ വ്യത്യസ്തമാക്കുന്നതെന്നും, വെറും സൗകര്യങ്ങൾക്കപ്പുറം ജീവിതം ആസ്വദിക്കാനാണ് താൻ ആഗ്രഹിക്കുന്നതെന്നും അദ്ദേഹം കൂട്ടിച്ചേർത്തു.
ഈ പോസ്റ്റിന് സോഷ്യൽ മീഡിയയിൽ സമിശ്ര പ്രതികരണങ്ങളാണ് ലഭിച്ചത്. വിദേശത്ത് കഴിയുന്ന പല ഇന്ത്യക്കാർക്കും തങ്ങളുടെ നാടിനോടുള്ള വൈകാരികമായ അടുപ്പമാണ് തനൂജിന്റെ വാക്കുകളിൽ പ്രതിഫലിക്കുന്നതെന്ന് പലരും അഭിപ്രായപ്പെട്ടു. ഹൃദയം എവിടെയാണോ അവിടെയാണ് വീട്” എന്നായിരുന്നു മറ്റൊരാളുടെ പ്രതികരണം. തനൂജിന്റെ ഈ കുറിപ്പ് പ്രവാസികൾക്കിടയിൽ വലിയ തോതിലുള്ള ചർച്ചകൾക്കാണ് വഴിതെളിച്ചത്.
