ബാലുശേരി: കളഞ്ഞുകിട്ടിയ സ്വർണാഭരണം തിരികെ നൽകി 73 കാരൻ മാതൃകയായി. ബാലുശേരി ഗോകുലം കോളജിന് സമീപം താമസിക്കുന്ന കണ്ണോറ ഭാസ്കരൻ നായർ കാൽനടയായി വീട്ടിലേക്ക് മടങ്ങുന്നതിനിടെ വഴിയിൽ ജ്വല്ലറിയുടെ പേരുള്ള പൗച്ചിനുള്ളിലായി സ്വർണാഭരണം കണ്ടെത്തുകയായിരുന്നു.
തുടർന്ന് ഭാസ്കരൻ നായർ മകൻ സജിത്ത് കുമാറിനെ വിവരം അറിയിക്കുകയും തുടർന്ന് ജ്വല്ലറിയുമായി ബന്ധപ്പെടുകയുമായിരുന്നു. പരിശോധനയിൽ കുമുള്ളിയിൽ നിന്നുള്ള ഒരു ദമ്പതികൾ മോട്ടോർസൈക്കിളിൽ യാത്ര ചെയ്യുന്നതിനിടെ വഴിയിൽ നഷ്ടപ്പെട്ട സ്വർണമാണിതെന്ന് സ്ഥിരീകരിച്ചു.
തുടർന്ന് ബാലുശേരി പോലീസ് സ്റ്റേഷനിൽ വച്ച് ഔദ്യോഗികമായി ഉടമസ്ഥർക്ക് കൈമാറി. ഒരു ലക്ഷത്തിലധികം രൂപ വിലമതിക്കുന്ന സ്വർണമാണ് ഉടമസ്ഥർക്ക് കൈമാറിയത്.
