സൂറത്ത്: കൂലി നൽകാത്തതിനാൽ ജോലിക്കു വിസമ്മതിച്ച 15 തൊഴിലാളി കുടുംബങ്ങളുടെ കുടിലുകൾക്കു തീയിട്ട സംഭവത്തിൽ ഒരാൾ അറസ്റ്റിൽ. മുഹമ്മദ് റഫീഖ് കുംഭാർ എന്നയാളാണ് അറസ്റ്റിലായത്. ഗുജറാത്തിലെ കച്ച് ജില്ലയിലാണ് ദിവസക്കൂലിക്ക് ജോലി ചെയ്യുന്ന തൊഴിലാളികളുടെ വീടുകൾക്കു തീയിട്ടത്.
കുടിലുകൾ പൂർണമായും കത്തിനശിച്ചെങ്കിലും സംഭവത്തിൽ ആർക്കും പരിക്കില്ല. അഞ്ജാർ ടൗണിൽനിന്ന് തൊഴിലാളികളെ മുഹമ്മദ് റഫീഖ് ജോലിക്ക് കൊണ്ടുപോകാറുണ്ടായിരുന്നു. എന്നാൽ അവർക്ക് യഥാസമയം കൂലി നൽകാറില്ലായിരുന്നു.
ഇതേത്തുടർന്ന് തൊഴിലാളികൾ പിന്നീട് ജോലിക്ക് പോകാൻ വിസമ്മതിച്ചു. ഇതാണ് പകയ്ക്ക് കാരണമെന്നു പറയുന്നു. ജോലി ചെയ്തിട്ടും ശമ്പളം നൽകിയില്ലെന്നു പരാതിക്കാരനായ ബദരീനാഥ് ഗംഗാറാം യാദവ് പറഞ്ഞു. പ്രതിക്കെതിരേ വധശ്രമത്തിനു കേസെടുത്തു.
