തൃപ്പൂണിത്തുറ: കേരള സ്കൂൾ ഓഫ് മെന്റലിസവും ആർട്സ് ഓഫ് മെന്റലിസവും സംയുക്തമായി സംഘടിപ്പിച്ച ലഹരിക്കെതിരേയുള്ള പ്രത്യേക ഉദ്യമത്തിൽ പങ്കെടുത്ത് തൃപ്പൂണിത്തുറ സ്വദേശി ബിജു കെ. കണ്ണൊത്ത് മൂന്ന് ലോക റെക്കോർഡുകൾ സ്വന്തമാക്കി.
മയക്കുമരുന്നിനോട് വിട എന്ന സന്ദേശത്തിന്റെ ഭാഗമായി ആർട്ട് ഓഫ് മെന്റലിസം എന്ന കലാവിഭാഗത്തെ ആധാരമാക്കി മദ്യം അതിവേഗത്തിൽ വെള്ളമായി മാറ്റുന്ന ശ്രമത്തിലൂടെയാണ് അമേരിക്കൻ ബുക്ക് ഓഫ് റിക്കാർഡ്, ഇന്റർനാഷണൽ ബുക്ക് ഓഫ് റിക്കാർഡ്, ഇൻഡോ വേൾഡ് ബുക്ക് ഓഫ് റിക്കാർഡ് എന്നിവയിൽ ബിജു ഇടം നേടിയത്.
ആലുവ ഗ്രീൻ പാർക്ക് കൺവൻഷൻ സെന്ററിൽ നടന്ന അവാർഡ് ദാന ചടങ്ങിൽ കേരള സ്കൂൾ ഓഫ് മെന്റലിസം ഡയറക്ടർ ആദിൽ, ആർട്സ് ഓഫ് മെന്റലിസം ഡയറക്ടർ സന്ദീപ് ഫ്രെഡിയൻ, സിനിമാ താരങ്ങളായ വിനയ് ഫോർട്ട്, വിനു മോഹൻ എന്നിവരുടെ കൈയിൽ നിന്നും ലോക റെക്കോർഡുകൾ ഏറ്റുവാങ്ങി.
ആക്ടിംഗ്, മിമിക്രി, ഡാൻസ്, സ്ക്രിപ്റ്റ് റൈറ്റിംഗ് എന്നീ മേഖലകളിൽ സജീവ സാന്നിധ്യമായ ബിജു, എച്ച്ഡിഎഫ്സി ബാങ്കിൽ സൂപ്പർബൈക്ക് കാൻവാസർ ആയി സേവനം ചെയ്യുകയാണ്. തൃപ്പൂണിത്തുറ കണ്ണോത്ത് വീട്ടിൽ കെ.ആർ. കാർത്തികേയൻ, ചെല്ലമ്മ ദമ്പതികളുടെ മകനാണ്.
