കണ്ണൂർ: മോട്ടോർ വാഹന വകുപ്പിൽ ഡ്രൈവിംഗ് ലൈസൻസിനായുള്ള ലേണേഴ്സ് ടെസ്റ്റിൽ പരീക്ഷാർഥികൾ മൊബൈൽ ഫോൺ ഉപയോഗിച്ച് ക്രമക്കേട് നടത്തുന്നതായി കണ്ടെത്തൽ. മോട്ടോർ വാഹന വകുപ്പ് ആർടി ഓഫീസുകളിൽ വച്ച് നടത്തുന്ന ഓൺലൈൻ ടെസ്റ്റിലാണ് പരീക്ഷാർഥികൾ ക്രമക്കേട് നടത്തുന്നതായി കണ്ടെത്തിയത്.
കംപ്യൂട്ടർ സ്ക്രീനിൽ വരുന്ന ചോദ്യങ്ങൾ മൊബൈൽ ഫോണിൽ ഫോട്ടോയെടുത്ത് പുറത്തുള്ളവർക്ക് അയച്ചു കൊടുക്കും. ഇവർ ഇതിന്റെ ശരിയായ ഉത്തരം പറഞ്ഞു കൊടുക്കും. ബ്ലൂ ടൂത്ത് ഇയർ ബഡ്സ് ചെവിയിൽ ഘടിപ്പിച്ച് ഇതു മറച്ചുകൊണ്ട് ഷാളോ അല്ലെങ്കിൽ പർദ പോലുള്ള വസ്ത്രങ്ങളോ ധരിച്ചെത്തുന്നവരാണ് പുറമെയുള്ളവരുടെ സഹായത്തോടെ ക്രമക്കേട് നടത്തിയത്.
സാധാരണ ഒരു പരീക്ഷാ കേന്ദ്രത്തിലും മൊബൈൽ ഫോണുകൾ അനുവദിക്കാറില്ല, ഓൺലൈൻ ലേണിംഗ് ടെസ്റ്റിന് മോട്ടോർ വാഹന വകുപ്പിന്റെ സൈറ്റിൽ കയറി പരീക്ഷയിൽ ചേരണമെങ്കിൽ ഒടിപി നന്പർ ലഭിക്കേണ്ടതുണ്ട്. അതുകൊണ്ടു തന്നെ ഫോൺ നിരോധിക്കാനാകാത്ത അവസ്ഥയാണ്.
ക്രമക്കേട് വ്യാപകമായി റിപ്പോർട്ട് ചെയ്യപ്പെട്ട സാഹചര്യത്തിൽ ബദൽ സംവിധാനം ഒരുക്കുന്നതിനെ കുറിച്ച് മോട്ടോർ വാഹന വകുപ്പ് ആലോചന ആരംഭിച്ചു.ക്രമക്കേടുകൾ നടത്തുന്നവരെ ദീർഘകാലത്തേക്ക് ടെസ്റ്റിൽ നിന്നും മാറ്റി നിർത്തുന്നതുൾപ്പടെയുള്ള കർശന നടപടികളും സ്വീകരിക്കാനാണ് തീരുമാനം.
- നിശാന്ത് ഘോഷ്
