ജീവിതശൈലീ രോഗങ്ങൾ വലിഞ്ഞു മുറുകിയൊരു സമൂഹമാണ് ഇന്നത്തെ പുതു തലമുറ. പണ്ടൊക്കെ നമ്മുടെ പൂർവികർ പാടത്തും പറന്പിലുമൊക്കെപ്പോയി പണിയെടുത്ത് അധ്വാനിച്ചു നടന്നിരുന്ന കാലത്തിൽ നിന്നെല്ലാം മാറി മനുഷ്യൻ ഇന്ന് ഓഫീസിന്റെ നാല് ചുവരുകൾക്കുള്ളിൽ ഒതുങ്ങിക്കൂടാൻ തക്കതായി മാറി.
ശരീരത്തിനുതകുന്ന വ്യായാമങ്ങളോ ചിട്ടകളോ പാലിക്കാൻ പലപ്പോഴും അമിത ജോലിഭാരം കാരണം സാധിക്കാതെ വരുന്നു. അതിനാൽത്തന്നെ വളരെ ചെറുപ്പത്തിൽത്തന്നെ ഷുഗർ പ്രഷർ കൊളസ്ട്രോൾ പോലെയുള്ള വില്ലൻമാർ മനുഷ്യ ശരീരത്തിൽ ഒരു അനുവാദവും കൂടാതെ സ്ഥാനം പിടിക്കും. പിന്നെ ഡയറ്റായി പട്ടിണി കിടക്കലായി.
മനുഷ്യായുസ് അൻപതിനു മുകളിൽ കിട്ടിയാൽ അത്രയും ഭാഗ്യമെന്ന് കരുതുന്ന തലമുറയാണ് ഇന്നുള്ളത്. ടിവി കണ്ടും സ്നാക്സ് കഴിച്ചുമൊക്കെ സമയം ചിലവഴിക്കുക എന്നൊക്കെ പറഞ്ഞാൽ അതിനോട് മുഖം തിരിക്കുകയാകും നമ്മളിൽ ഭൂരിഭാഗം ആളുകളും. എന്നാൽ ഇതൊക്കെത്തന്നെയാണ് തന്റെ 101 -ാം വയസിന്റെ രഹസ്യമെന്ന് വെളിപ്പെടുത്തിയിരിക്കുകയാണ് ചൈനക്കാരിയായ ഒരു വയോധിക.
രാത്രി രണ്ട് മണി വരെ ടിവി കണ്ട് ഇരിക്കലാണ് ഈ മുത്തശിയുടെ ശീലം. രാവിലെ പത്തിനു ഉണരും, ഉടൻ കടുപ്പത്തിൽ ഒരു ഗ്രീൻ ടീ നിർബന്ധം. കഴിഞ്ഞ രണ്ട് വർഷത്തിനിടയിലാണ് ഈ പതിവ് ആരംഭിച്ചത് എന്ന് അവരുടെ മകൾ യാവോ സോങ്പിംഗ് പറയുന്നു.
ഒരു വീഴ്ചയിൽ കൈയ്ക്ക് പരിക്കേറ്റിരുന്നു. അതിനാൽ വീട്ടുജോലി ചെയ്യുന്നതിനു മുത്തശിയെ വീട്ടുകാർ അനുവദിച്ചിരുന്നില്ല. പകൽസമയത്ത് ഒന്നും ചെയ്യാനില്ലാത്തതിനാൽ രാവിലെ കൂടുതൽ ഉറങ്ങാനും രാത്രിയിൽ ഉണർന്നിരിക്കാനും തുടങ്ങി. ‘നന്നായി ഭക്ഷണം കഴിക്കുക, നന്നായി ഉറങ്ങുക, ഗ്രീൻ ടീ ആസ്വദിക്കുക ഇതാണ് ആയുസിന്റെ രഹസ്യമെന്നാണ് മുത്തശിയുടെ വാദം.
