മലന്പുഴ: റിംഗ് റോഡ്,അകത്തേത്തറ മേൽപ്പാലം എന്നിവയടക്കമുള്ള മലന്പുഴ നിയോജക മണ്ഡലത്തിലെ വികസന പ്രവർത്തനങ്ങൾ പൂർത്തിയാക്കാൻ ആവശ്യമായ നടപടികൾ സ്വീകരിക്കണമെന്ന് ആവശ്യപ്പെട്ട് വി.എസ്.അച്യുതാനന്ദൻ എം.എൽ.എ ജില്ലാ കലക്ടർ ഡി.ബാലമുരളിക്ക് കത്ത് നൽകി. വനംവകുപ്പിൽ നിന്ന ്റിംഗ് റോഡിനായുള്ള ഭൂമി വിട്ടു കിട്ടുന്നതിനായി നിരാക്ഷേപ പത്രം നൽകേണ്ടത് സർക്കാരാണ്.
അകത്തേത്തറ നടക്കാവ് മേൽപ്പാലനിർമാണത്തിനായി സ്ഥലം ഏറ്റെടുക്കൽ കാലതാമസം കൂടാതെ പൂർത്തിയാക്കേണ്ടതുണ്ട്.പ്രളയത്തിൽ വീടും കൃഷിയും നഷ്ടപ്പെട്ടവർക്കുള്ള ധനസഹായവും പുനർനിർമാണ പ്രവർത്തനങ്ങളും സമയബന്ധിതമായി പൂർത്തിയാക്കണമെന്നും എം.എൽ.എ ആവശ്യപ്പെട്ടു.
പുതുശേരി ഗ്രാമപഞ്ചായത്തിലെ ചെല്ലൻകാവ്,ഏരി,ചുള്ളിമട ഏരി,മരുതറോഡ് ഗ്രാമപഞ്ചായത്തിലെ മലന്പുഴ കനാൽ ബണ്ടുകൾ,ആറങ്ങോട്ടുകുളന്പ് പാലം, കരിമൻകാട് പാലം,പടലിക്കാട് പാലവും റോഡും, എലപ്പുള്ളി ഗ്രാമപഞ്ചായത്തിലെ എടുപ്പുകുളം ചെക്ക് ഡാം, നെല്ലിയാന്പള്ളം കനാൽ ബണ്ട് എന്നിവ ഉൾപ്പെടെ പുനർനിർമിക്കാൻ ആവശ്യമായ അടിയന്തര നടപടികൾ സ്വീകരിക്കണമെന്നാവശ്യപ്പെട്ടാണ് കത്ത്.