കണ്ണൂർ: പട്ടാപ്പകൽ വീട്ടിലെത്തിയ രണ്ടംഗ സംഘം പള്ളിക്കുന്നിലെ ദന്പതികളെ ഭീഷണിപ്പെടുത്തി 30 പവൻ സ്വർണാഭരണങ്ങളും 30,000 രൂപയും കവർന്ന സംഭവത്തിൽ പ്രതികളെ തിരിച്ചറിഞ്ഞു. പള്ളിക്കുന്ന് മൂകാംബിക റോഡിലെ ഷെറിന്‍റെ ദിൻഷെയർ എന്ന വീട്ടിൽ അതിക്രമിച്ചു കയറിയ സ്ത്രീയും പുരുഷനുമടങ്ങിയ സംഘമാണ് ഷെറിനെയും ഭാര്യയെയും ഭീഷണിപ്പെടുത്തി വൻകവർച്ച നടത്തിയത്.
ഇന്നലെ രാവിലെ 11.30ഓടെയായിരുന്നു സംഭവം. ഇവരുടെ തറവാട്ട് വീട്ടിൽ ജോലിക്ക് നിന്ന തമിഴ്നാട് സ്വദേശിനിയായ ഹോം നഴ്സും അവരോടൊപ്പമുണ്ടായ പുരുഷനും ചേർന്നാണ് കവർച്ച നടത്തിയതെന്ന് ഷെറിൻ കണ്ണൂർ ടൗൺ പോലീസിനു നൽകിയ പരാതിയിൽ പറഞ്ഞിരുന്നു. സംഭവമറിഞ്ഞ് ടൗൺ പോലീസ് സ്ഥലത്തെത്തി പരിശോധന നടത്തി. പ്രതികൾ ജില്ല വിടാതിരിക്കാൻ സംസ്ഥാന അതിർത്തികളിൽ ജാഗ്രത പുലർത്തുന്നുണ്ട്.
