കോട്ടയം: ഓണ്ലൈന് ട്രേഡിംഗിന്റെ പേരില് ഒന്നരക്കോടിയോളം രൂപ തട്ടിപ്പുനടത്തിയ കേസിലെ മൂന്നു പ്രതികളെ കൂടി ചിങ്ങവനം പോലീസ് അറസ്റ്റ് ചെയ്തു. തൃശൂര് കോടങ്ങോട് വടക്കേടത്ത് അബ്ദുല് ഷുക്കൂര് ( 43), തൃശൂര് ചെങ്ങമനാട് കിഴക്കേടത്ത് കെ.ജി. രാജേഷ് (40), മലപ്പുറം പൂവത്തിങ്കല് കുതിരവട്ടം ഷിബീഷ് ലാല് (29) എന്നിവരെയാണു അറസ്റ്റ് ചെയ്ത്.
സ്വകാര്യ സ്ഥാപനത്തിന്റെ അക്കൗണ്ടില് വിവിധ കമ്പനികളിലെ ഓഹരികള് ട്രേഡിംഗ് ലാഭവും ലാഭവിഹിതവും വാങ്ങിത്തരാം എന്ന് വാഗ്ദാനം ചെയ്താണു തട്ടിപ്പ് നടത്തിയത്. ചിങ്ങവനം സ്വദേശി നല്കിയ പരാതിയിലാണു പോലീസ് കേസ് രജിസ്റ്റര് ചെയ്തത്.
കേസില് ഉള്പ്പെട്ടെ മറ്റു പ്രതികളെ പോലീസ് മുമ്പു പിടികൂടിയിരുന്നു. ഇവര് ചിങ്ങവനം സ്വദേശിയുടെ പേരിലുള്ള ഫെഡറല് ബാങ്ക് ചിങ്ങവനം ബ്രാഞ്ചിലെ അക്കൗണ്ടില് നിന്നും എസ്ബിഐ കുറിച്ചി ബ്രാഞ്ചിലെ അക്കൗണ്ടില് നിന്നും പലതവണകളായി 1,59,43547 വാങ്ങിയെടുക്കുകയായിരുന്നു.
നാളുകള് കഴിഞ്ഞിട്ടും ട്രേഡിംഗ് നടത്തി ലാഭം നല്കാതെ വന്നതോടെ പരാതിക്കാരന് പണം തിരികെ ആവശ്യപ്പെട്ടു. തുടര്ന്നു പരാതി നല്കുകയായിരുന്നു. കോടതിയില് ഹാജരാക്കിയ പ്രതികളെ റിമാന്ഡ് ചെയ്തു. ചെറിയ ലാഭത്തിനുവേണ്ടി സ്വന്തം ബാങ്ക് അക്കൗണ്ടുകള് തട്ടിപ്പുകാര്ക്ക് വേണ്ടി ദുരുപയോഗം ചെയ്യുന്നതിലൂടെ അവരും ഈ വലിയ കുറ്റകൃത്യത്തിന്റെ ഭാഗമാവുകയും കുറ്റകൃത്യത്തിലെ പ്രതികളായി മാറുകയും ചെയ്യുമെന്ന് പോലീസ് പറഞ്ഞു.
