വണ്ടിപ്പെരിയാർ: വണ്ടിപ്പെരിയാറിൽ വീണ്ടും ബാലികാപീഡനം. 16 കാരിയെ ഭീഷണിപ്പെടുത്തിയ 43 കാരനെ പോലീസ് അറസ്റ്റ് ചെയ്തു.
പശുമല സ്വദേശി ഷിബുവിനെയാണ് പോലീസ് അറസ്റ്റ് ചെയ്തത്. ചൈൽഡ് ലൈൻ നൽകിയ റിപ്പോർട്ടിന്റെ അടിസ്ഥാനത്തിലാണ് അറസ്റ്റ്.
സംഭവത്തെക്കുറിച്ച് പോലീസ് പറയുന്നത്: പശുമല തവരാണ ലയത്തിൽ താമസിക്കുന്ന ഷിബു തൊഴിലാളി ലയത്തിൽ താമസിക്കുന്ന 16 കാരിയെ ഭീഷണിപ്പെടുത്തി മൊബൈലിൽ കുട്ടിയുടെ നഗ്നചിത്രം പകർത്തുകയായിരുന്നു.
ആറുമാസം മുന്പാണ് സംഭവം. അന്ന് ഫോട്ടോ ഷിബു ചിലരെ കാണിക്കുകയും ചെയ്തു. ഇതോടെയാണ് വിവരം പുറത്തുവന്നത്.
തുടർന്ന് ഇടുക്കി ചൈൽഡ് ലൈൻ കുട്ടികൾക്കെതിരായ അതിക്രമത്തിൽ കേസെടുക്കുകയും വണ്ടിപ്പെരിയാർ പോലീസിനു കൈമാറുകയും ചെയ്തു. പിന്നീടാണ് പ്രതിയെ വണ്ടിപ്പെരിയാർ പോലീസ് അറസ്റ്റ് ചെയ്തത്.
17 കാരിയെ പീഡിപ്പിച്ച യുവാവ് പിടിയിൽ
നെടുങ്കണ്ടം: വിവാഹ വാഗ്ദാനം നൽകി പ്ലസ് ടു വിദ്യാർഥിനിയെ പീഡിപ്പിച്ച സംഭവത്തിൽ യുവാവ് അറസ്റ്റിൽ.
പത്തിനിപ്പാറ മുട്ടുങ്കൽമറ്റം അൻവർ റസാഖിനെ(21)യാണ് നെടുങ്കണ്ടം പോലീസ് പിടികൂടിയത്.പെണ്‍കുട്ടിയും പ്രതിയും പ്രണയത്തിലായിരുന്നതായി പറയുന്നു.
17കാരിയായ പെണ്‍കുട്ടിയെ കഴിഞ്ഞ ഒന്നരവർഷമായി പ്രതി പീഡിപ്പിച്ചിരുന്നതായും പ്രതിയുടെ കാറിൽ പെണ്‍കുട്ടിയ നെടുങ്കണ്ടം-ഉടുന്പൻചോല റോഡരികിലെ ആളൊഴിഞ്ഞ സ്ഥലത്തെത്തിച്ചാണ് പീഡിപ്പിച്ചിരുന്നതെന്നും പോലീസ് പറയുന്നു.
പെണ്‍കുട്ടിയുടെ ബന്ധുക്കളുടെ പരാതിയിലാണ് പ്രതിയെ അറസ്റ്റുചെയ്തത്. ഇയാൾക്കെതിരെ ബലാത്സംഗം, പോക്സോ വകുപ്പുകൾ പ്രകാരമാണ് കേസെടുത്തിരിക്കുന്നത്. പ്രതിയെ കോടതിയിൽ ഹാജരാക്കി റിമാൻഡുചെയ്തു.
