ലോകമെമ്പാടുമുള്ള മൃഗസ്നേഹികളുടെ പ്രിയങ്കരിയായിരുന്ന സിൻസിനാറ്റി മൃഗശാലയിലെ ‘ഫിയോണ’ എന്ന ഒൻപത് വയസുകാരി ഹിപ്പോപ്പൊട്ടാമസ് വിടവാങ്ങി. മാസം തികയാതെ ജനിച്ചിട്ടും അതിജീവനത്തിന്റെ അത്ഭുതമായി മാറി ലോകശ്രദ്ധ നേടിയ ഫിയോണ, കഴിഞ്ഞ ആഴ്ച അബദ്ധത്തിൽ വിഴുങ്ങിയ ഒരു തുന്നിയ തൊപ്പി മൂലമുണ്ടായ ആരോഗ്യപ്രശ്നങ്ങളെ തുടർന്നാണ് വ്യാഴാഴ്ച മരണത്തിന് കീഴടങ്ങിയത്.
മൃഗശാലാ അധികൃതർ നൽകുന്ന വിവരമനുസരിച്ച്, ഒരു കുട്ടി മുകളിലേക്ക് എറിഞ്ഞ തൊപ്പി സീലിംഗ് ഫാനിൽ തട്ടി തെറിച്ച്, 12 അടി ഉയരമുള്ള ഗ്ലാസ് ഭിത്തിക്ക് മുകളിലെ ഒരടി വിടവിലൂടെ ഫിയോണയുടെ കൂട്ടിലേക്ക് വീഴുകയായിരുന്നു. ഇത് വിഴുങ്ങി ദിവസങ്ങൾക്കുള്ളിൽ ഫിയോണയുടെ ആരോഗ്യനില വഷളായി.
പോസ്റ്റ്മോർട്ടം റിപ്പോർട്ട് പുറത്തുവന്നാലേ ഔദ്യോഗിക കാരണം വ്യക്തമാകൂ എങ്കിലും, കുടലിൽ തൊപ്പി കുടുങ്ങിയതിനെ തുടർന്നുണ്ടായ സങ്കീർണ്ണതകളാകാം മരണത്തിലേക്ക് നയിച്ചതെന്ന് നോർത്ത് കരോലിന സ്റ്റേറ്റ് യൂണിവേഴ്സിറ്റിയിലെ വെറ്ററിനറി മെഡിസിൻ വിഭാഗം മേധാവി ജാൻ ഹോക്കിൻസ് പറയുന്നു.
ഒരു ഹിപ്പോയുടെ ദഹനനാളത്തിൽ തടസമുണ്ടാകുന്നത്, വളരെ നീളമുള്ള ഒരു ഒറ്റവരിപ്പാതയിൽ വാഹനാപകടം സംഭവിക്കുന്നത് പോലെയാണ്. മനുഷ്യരുടെ ചെറുകുടലിനും വൻകുടലിനും കൂടി ഏകദേശം 25 അടി നീളമുള്ളപ്പോൾ, ഒരു ഹിപ്പോയുടെ കുടലിന് 100 അടിയിലധികം നീളമുണ്ട് (ചെറുകുടലിന് മാത്രം 70 അടിയിലേറെ നീളം വരും). സാധാരണഗതിയിൽ ഭക്ഷണം ദഹിച്ചു പുറത്തുപോകാൻ ഹിപ്പോകൾക്ക് രണ്ടോ മൂന്നോ ദിവസം മതിയാകും. ഞായറാഴ്ചയോടെ തൊപ്പി വിഴുങ്ങിയ ഫിയോണയ്ക്ക് ആദ്യ ദിവസങ്ങളിൽ ലക്ഷണങ്ങളൊന്നും ഉണ്ടായിരുന്നില്ലെങ്കിലും, പിന്നീട് വിശപ്പില്ലായ്മ അനുഭവപ്പെട്ടു തുടങ്ങി. അഞ്ച് ദിവസത്തിനുള്ളിൽ തൊപ്പി പുറത്തുപോയില്ലെങ്കിൽ അത് അപകടകരമാകുമെന്ന് വിദഗ്ധർ ചൂണ്ടിക്കാട്ടുന്നു.
ശസ്ത്രക്രിയ ഒഴിവാക്കിയതോടെ സ്വാഭാവിക രീതിയിൽ തൊപ്പി പുറന്തള്ളാൻ മൃഗശാലാ അധികൃതർ തീവ്രശ്രമം നടത്തിയിരുന്നു. അൾട്രാസൗണ്ട് പരിശോധനയ്ക്ക് ശേഷം മരുന്നുകളും എനിമയും നൽകി. കൊളംബസ് മൃഗശാലയിൽ നിന്ന് ഒൻപത് അടി നീളമുള്ള പ്രത്യേക എൻഡോസ്കോപ്പ് എത്തിച്ച് പരിശോധന നടത്തുകയും, ദഹനപ്രക്രിയ വേഗത്തിലാക്കാൻ കുതിരഫാമിൽ നിന്ന് ‘വൈബ്രേഷൻ പ്ലേറ്റ്’ കൊണ്ടുവന്ന് ഉപയോഗിക്കുകയും ചെയ്തു. എന്നാൽ എല്ലാ പരിശ്രമങ്ങളെയും വിഫലമാക്കി ഫിയോണ മരണത്തിന് കീഴടങ്ങുകയായിരുന്നു.
