പാലക്കാട്: തിരുവനന്തപുരം കോർപറേഷനിലെ ശാസ്തമംഗലം വാർഡിലെ ബിജെപി കൗൺസിലർ ആർ. ശ്രീലേഖയുടെ രാജിയിൽ പ്രതികരണവുമായി എൽഡിഎഫ് കൺവീനർ ടി.പി. രാമകൃഷ്ണൻ. ശ്രീലേഖ കൗൺസിലർ സ്ഥാനം രാജിവച്ചെന്നറിയുന്നു എന്നും ബിജെപിക്ക് അകത്തെ ജീർണത പുറത്തുവരുന്നു, തിരുവനന്തപുരത്ത് ബിജെപിക്ക് അധികാരത്തിൽ തുടരാൻ കഴിയില്ലെന്നും രാമകൃഷ്ണൻ പറഞ്ഞു.
ഇത് ബിജെപി ക്യാമ്പിൽ നിന്ന് തന്നെ പുറത്തുവരുന്ന വിവരമാണ്. അസ്വസ്ഥതയുടെ തെളിവാണ് ശ്രീലേഖയുടെ രാജി. എൽഡിഎഫും സിപിഎമ്മും ഈ വിഷയത്തിൽ നിലപാട് സ്വീകരിക്കും എന്നും അദ്ദേഹം പ്രതികരിച്ചു.
മേയര്‍ സ്ഥാനം നൽകാത്തതിൽ കടുത്ത അതൃപ്തിയിലായിരുന്ന ആര്‍ ശ്രീലേഖ നിലവില്‍ കൗണ്‍സിലർ സ്ഥാനം രാജി വെച്ചിരിക്കുകയാണ്. രാജി ബിജെപിക്ക് വലിയ തിരിച്ചടിയാണ്. ഇനി 49 അംഗങ്ങളാണ് ബിജെപിക്ക് കോർപ്പറേഷനിലുള്ളത്. ഉപതെരഞ്ഞെടുപ്പ് നിർണായകമാകും. പാര്‍ട്ടി നേതൃത്വവുമായുള്ള ഭിന്നതയ്ക്കിടെയാണ് ശ്രീലേഖയുടെ രാജി തീരുമാനം എന്നാണ് റിപ്പോർട്ടുകൾ.
