വാഷിംങ്ടൺ ഡിസി: യുഎസ് പ്രസിഡന്റ് കാലാവധി അവസാനിച്ചാൽ താൻ വെനസ്വേലൻ പ്രസിഡന്റ് തെരഞ്ഞെടുപ്പിൽ മത്സരിക്കുമെന്ന് ഡോണാൾഡ് ട്രംപ്. വെനസ്വേലയിൽ തനിക്ക് വലിയ ജനപിന്തുണയാണ് ഉള്ളതെന്നും തെരഞ്ഞെടുപ്പിൽ മത്സരിക്കുന്നതിനു വേണ്ടി വേഗത്തിൽ സ്പാനിഷ് പഠിക്കുമെന്നും ട്രംപ് തമാശരൂപേണ വാർത്താസമ്മേളനത്തിൽ പറഞ്ഞു.
വെനസ്വേലയിലെ ജനങ്ങൾ താൻ അവിടെ പ്രസിഡന്റായി കാണാൻ ആഗ്രഹിക്കുന്നുണ്ട്. താൻ മത്സരിച്ചാൽ ആർക്കും ഇതുവരെ ലഭിക്കാത്ത ഭൂരിപക്ഷത്തിൽ വിജയിക്കും. അതുകൊണ്ട് യുഎസിലെ കാലാവധി അവസാനിച്ചാൽ വെനസ്വേലയിലേക്കു പോകാനാണ് ആഗ്രഹിക്കുന്നത്- ട്രംപ് പറഞ്ഞു.
നിലവിലെ പ്രസിഡന്റിൽ വെനസ്വേലൻ ജനത സന്തുഷ്ടരാണെന്നും എന്നാൽ വലിയൊരു മാറ്റം അവിടെയുള്ളവർ ആഗ്രഹിക്കുന്നുണ്ടെന്നും ട്രംപ് പറഞ്ഞു. വെനസ്വേലൻ സൈന്യത്തിന്റെ പക്കൽ റഷ്യൻ, ചൈനീസ് നിർമിത ആധുനിക ആയുധങ്ങൾ ഉണ്ടായിട്ടും യുഎസ് സൈന്യത്തോടു പിടിച്ചുനിൽക്കാൻ കഴിഞ്ഞില്ലെന്നും ട്രംപ് കൂട്ടിച്ചേർത്തു. മയക്കുമരുന്ന് കടത്ത് ആരോപിച്ച് വെനസ്വേല പ്രസിഡന്റ് നിക്കോളാസ് മഡുറോ, ഭാര്യ സിലിയ എന്നിവരെ കഴിഞ്ഞ ജനുവരിയിലാണ് യുഎസ് സൈന്യം തടവിലാക്കിയത്.
