ഒരു പ്രായം കഴിഞ്ഞാൽ മനുഷ്യന്റെ സേവിംഗ്സ് മെച്ചപ്പെടുത്തണമെന്ന് പറയുന്നത് വലിയ കാര്യം തന്നെയാണ്. ഓരോ വർഷം മുന്നോട്ട് പോകുന്പോൾ ചിലവുകളും ആവശ്യങ്ങളും വർധിക്കും. അനാവശ്യ കാര്യങ്ങൾക്കായി പണം ചിലവാക്കുന്പോൾ ശ്രദ്ധിക്കേണ്ട കാര്യങ്ങളെ കുറിച്ച് ഇൻഫ്ലുവൻസറായ പ്രിയ യാദവ് പങ്കുവച്ച വീഡിയോ ആണിപ്പോൾ ശ്രദ്ധ നേടുന്നത്.
അഞ്ച് ലക്ഷം രൂപ തികച്ച് അക്കൗണ്ടിൽ ഇല്ലാത്തവർ താഴെ പറയുന്ന കാര്യങ്ങൾ ചെയ്യരുതെന്ന് പറഞ്ഞാണ് പ്രിയ വീഡിയോ ചെയ്തിരിക്കുന്നത്. അനാവശ്യമായ ഷോപ്പിംഗ് ഒഴിവാക്കുക, അവധി ആഘോഷിക്കാനോ വിനോദയാത്രകൾക്കോ പോകരുത്, ഡേറ്റിംഗിന് പോകുന്നത് നിയന്ത്രിക്കുക, ദിവസവും പുറത്തുനിന്ന് കോഫി കുടിക്കുന്നത് ഒഴിവാക്കുക, നെറ്റ്ഫ്ലിക്സ് കണ്ട് സമയം കളയരുത് എന്നാണ് പ്രിയയുടെ ഉപദേശം.
“ആ സുഖസൗകര്യങ്ങൾ ഇതുവരെ നിങ്ങൾ അർഹിച്ചിട്ടില്ല. ജീവിതം സെറ്റിൽ ആയതുപോലെ പെരുമാറുന്നത് ഇനിയെങ്കിലും നിർത്തണം”. പഠിക്കാനും പണം സമ്പാദിക്കാനും ഏറ്റവും കൂടുതൽ അവസരങ്ങളുള്ള കാലഘട്ടമാണിത്, പണം സമ്പാദിക്കാൻ അറിയില്ല എന്ന് പറയുന്നത് പുരോഗതിയെക്കാൾ ഉപരി സുഖസൗകര്യങ്ങൾക്ക് മുൻഗണന നൽകുന്നത് കൊണ്ടാണ്. മാനസികമായ വിഷമങ്ങളോ ട്രോമകളോ സാമ്പത്തികമായി പിന്നോട്ട് പോകാൻ കാരണമായി പറയരുത്
എന്നും യുവതി പറഞ്ഞു.
എന്നാൽ യുവതി പങ്കുവച്ച വീഡിയോ വലിയ വിമർശനങ്ങളാണ് ഉണ്ടാക്കിയത്. ജീവിതം ഒന്നേ ഉള്ളു നിങ്ങൾ പറഞ്ഞതു പോലെ ജീവിക്കാൻ മനുഷ്യനായി ജനിച്ച ആർക്കും സാധിക്കില്ലെന്നാണ് ബഹു ഭൂരിപക്ഷം ആളുകളും പറഞ്ഞത്.
എന്നാൽ പ്രിയയെ പിന്തുണച്ചും ധാരാളം ആളുകൾ എത്തി.പ്രിയ പറഞ്ഞത് ഒരു റിയാലിറ്റിയാണ്. പെട്ടെന്ന് ഒരു അത്യാവശ്യം വന്നാൽ ഭൂരിഭാഗം ആളുകളും പാപ്പരാകുന്നത് കൃത്യമായ സമ്പാദ്യമില്ലാത്തത് കൊണ്ടാണ് എന്നും അക്കൂട്ടർ പറഞ്ഞു.
