ഭക്ഷണശാലയിൽ നിന്നും പണം മോഷ്ടിച്ച യുവാവിന്റെ അമ്മ നേരിട്ടെത്തി തന്റെ മകൻ മോഷ്ടിച്ച തുക തിരികെ നൽകിയ വാർത്തയാണ് ഇപ്പോൾ സോഷ്യൽ മീഡിയയിൽ വൈറലാകുന്നത്. അമേരിക്കയിലെ ബാൾട്ടിമോറിൽ ഫുഡ് ട്രക്ക് നടത്തുന്ന പ്രശസ്ത സമൂഹ മാധ്യമ താരം മുഹ്സിൻ സറാക്കിന്റെ കടയിൽ നിന്നാണ് യുവാവ്.
അദ്ദേഹം തന്റെ ബിസിനസ് ലൈവ് സ്ട്രീം ചെയ്യുന്നതിനിടെ ഒരാൾ കൗണ്ടറിലിരുന്ന ടിപ്പ് ജാറിൽ നിന്ന് പണം തട്ടിയെടുത്ത് ഓടുകയായിരുന്നു. ഈ ദൃശ്യങ്ങൾ കാമറയിൽ പതിഞ്ഞിരുന്നു. സംഭവം നടന്ന് ഏതാനും ദിവസങ്ങൾക്ക് ശേഷം ഒരു സ്ത്രീ സറാക്കിന്റെ അടുത്തേക്ക് എത്തി.
തന്റെ മകൻ എത്രരൂപയാണ് മോഷ്ടിച്ചതെന്ന് ചോദിച്ചു. ചോദ്യം കേട്ടതോടെ മുഹ്സിൻഞെട്ടിപ്പോയി. ഉടൻതന്നെ അവർ പറഞ്ഞു, നിങ്ങൾ കഴിഞ്ഞ ദിവസം ലൈവ് സ്ട്രീം ചെയ്യുന്നതിനിടെ പണം തട്ടിയെടുത്ത് ഒരാൾ പോയില്ലേ, അത് എന്റെ മകൻ ആയിരുന്നു. അവൻ എത്ര രൂപയാണ് മോഷ്ടിച്ചതെന്ന് തനിക്ക് അറിയണം ആ പണം തരാനാണ് വന്നതെന്ന് ആ ആമ്മ പറഞ്ഞു.
പണം വേണ്ടെന്ന് മുഹ്സിൻ അവരോട് പറഞ്ഞു. എന്നാൽ താൻ തന്റെ മകനെ വളർത്തിയത് ഒരു മോഷ്ടാവായിട്ടല്ല, തന്റെ മകൻ മോശം വ്യക്തിയല്ലെന്നും മദ്യലഹരിയിൽ അവൻ എടുത്ത തെറ്റായ തീരുമാനമായിരുന്നു അതെന്നും പറഞ്ഞ് പണം കൊടുത്തു. വികാരാധീനനായ സറാക്ക് ആ അമ്മയെ കെട്ടിപ്പിടിക്കുന്ന വീഡിയോ സമൂഹ മാധ്യമങ്ങളിൽ വൈറലായി. തന്റെ മകന്റെ തെറ്റ് തിരുത്താൻ കാണിച്ച ആ അമ്മയുടെ സത്യസന്ധതയെ എല്ലാവരും പ്രശംസിച്ചു.
