ഗാന്ധിജയന്തി ദിനത്തില്‍ സിനിമാലോകത്തെയാകെ ഞെട്ടിക്കുന്ന ഒരു വാര്‍ത്തയാണ് പുറത്തു വന്നത്. ബോളിവുഡ് സൂപ്പര്‍താരം ഷാരൂഖ് ഖാന്റെ മൂത്തമകന്‍ ആര്യന്‍ ഖാന്‍ ഉള്‍പ്പെടെയുള്ള സംഘത്തെ മയക്കുമരുന്ന് കേസില്‍ പിടികൂടിയ കാര്യം അമ്പരപ്പോടെയാണ് സിനിമാപ്രേമികള്‍ ശ്രവിച്ചത്.
രാജ്യത്തെ ഏറ്റവും വലിയ ആഡംബര കപ്പലായ കോര്‍ഡിലിയയില്‍ വച്ച് നടത്തിയ പാര്‍ട്ടിയിലാണ് ആര്യനും സംഘവും ലഹരി ഒഴുക്കിയത്.
ഇവിടെ ലഹരി പാര്‍ട്ടി നടക്കുമെന്ന് മുന്‍കൂട്ടി വിവരം കിട്ടിയ നാര്‍ക്കോട്ടിക് കണ്‍ട്രോള്‍ ബ്യൂറോ(എന്‍സിബി) ഉദ്യോഗസ്ഥര്‍ പാര്‍ട്ടിയില്‍ പങ്കെടുക്കാനെത്തിയവര്‍ എന്ന വ്യാജേന സിവില്‍ ഡ്രസില്‍ എത്തി മയക്കുമരുന്ന് സംഘത്തെ കുടുക്കുകയായിരുന്നു.
ഷാരൂഖിന്റെ മകന്‍ ആര്യനെയും സുഹൃത്തുക്കളെയും കസ്റ്റഡിയിലെടുത്ത ശേഷം എന്‍സിബി അറസ്റ്റ് രേഖപ്പെടുത്തുകയായിരുന്നു. ആര്യന്റെ ഉറ്റ സുഹൃത്തായ അര്‍ബാസ് മര്‍ച്ചന്റായിരുന്നു പരിപാടിയുടെ സംഘാടകന്‍.
നടിയും മോഡലുമായ മൂണ്‍മുണ്‍ ധമേച്ച,നൂപുര്‍ സരിക തുടങ്ങി എട്ടുപേരാണ് കേസില്‍ അറസ്റ്റിലായത്.മൂന്നു ഗ്രാം കൊക്കെയ്ന്‍,21 ഗ്രാം ചരസ്, അഞ്ച് ഗ്രാം എംഡി, 22 എംഡിഎംഎ ഗുളികകള്‍ എന്നിവയും പ്രതികളില്‍ നിന്നു കണ്ടെടുത്തു.
മര്‍ച്ചന്റ് ഷാരൂഖിന്റെ മക്കളായ സുഹാനയുടെയും ആര്യന്റെയും ഉറ്റ സുഹൃത്താണ് പ്രധാന പ്രതി അര്‍ബാസ് ഖാന്‍. ചില സിനിമകളിലും ഇയാള്‍ അഭിനയിച്ചിട്ടുണ്ട്. നിരവധി പാര്‍ട്ടികളില്‍ ഇയാള്‍ സുഹാനയ്ക്കും ആര്യനൊപ്പം പങ്കെടുത്തതിന്റെ ചിത്രങ്ങളും ഇതിനോടകം പുറത്തു വരികയും ചെയ്തു.
ചില ചിത്രങ്ങളില്‍ ഇവര്‍ക്കൊപ്പം ബോളിവുഡിലെ യുവനടി അനന്യാ പാണ്ഡെയെയും കാണാം. നടി അലയാ എഫും അര്‍ബാസും തമ്മില്‍ പ്രണയത്തിലാണെന്ന് ഏറെക്കാലമായി പ്രചരണങ്ങളുണ്ടായിരുന്നു.
അറസ്റ്റിലായ മോഹന്‍ ജസ്വാളും നൂപുര്‍ സരികയും ഡല്‍ഹി സ്വദേശികളാണ് മാത്രമല്ല ഇരുവരും ഫാഷന്‍ ഡിസൈനര്‍മാരുമാണ്. അറസ്റ്റിലായ മറ്റൊരാളായ ഗോമിത് ആകട്ടെ ഹെയര്‍ സ്‌റ്റൈലിസ്റ്റും സെലിബ്രിറ്റി മേക്കപ്പ് ആര്‍ട്ടിസ്റ്റുമാണ്.
കൂട്ടത്തില്‍ ഏറ്റവുമധികം ഉയര്‍ന്നു കേട്ട പേരുകളിലൊന്നായ മൂണ്‍മൂണ്‍ ധമേച്ച ഒരു ഫാഷന്‍ മോഡലും നടിയുമാണ്.
മധ്യപ്രദേശിലെ ഒരു ബിസിനസുകാരന്റെ മകളായ മൂണ്‍മൂണിന് ഇന്‍സ്റ്റഗ്രാമില്‍ നിരവധി ആരാധകരുണ്ട്. ധമേച്ച ഉള്‍പ്പെടെയുള്‍പ്പെടെ അറസ്റ്റിലായവരെ വൈദ്യപരിശോധനയ്ക്കു ശേഷം ഇന്ന് കോടതിയുടെ മുമ്പില്‍ ഹാജരാക്കും എന്നാണ് വിവരം.
