ഉത്തര്‍പ്രദേശില്‍ ഭാര്യയെ ഓണ്‍ലൈനില്‍ വില്‍പ്പനയ്ക്കു വച്ച ഭര്‍ത്താവിനെ പോലീസ് പിടികൂടി.
മോട്ടോര്‍ സൈക്കിള്‍ വേണം എന്ന ആവശ്യം ഭാര്യയുടെ വീട്ടുകാര്‍ നിറവേറ്റാത്തതില്‍ കുപിതനായ ഭര്‍ത്താവ് യുവതിയെ വില്‍പ്പനയ്ക്ക് വെയ്ക്കുകയായിരുന്നു. സോഷ്യല്‍മീഡിയയില്‍ ഭാര്യയുടെ ചിത്രവും ഫോണ്‍ നമ്പറും പങ്കുവെച്ചായിരുന്നു അപമാനിച്ചത്.
ഫോണിലേക്ക് നിരവധി കോളുകള്‍ വന്നതോടെയാണ് യുവതി കാര്യം അന്വേഷിച്ചത്. തുടര്‍ന്ന് ഫേസ്ബുക്കിലൂടെ ഭര്‍ത്താവ് നടത്തിയ വിക്രിയയാണ് കാരണമെന്ന് മനസ്സിലായി. ഉടന്‍ തന്നെ പോലീസ് സ്‌റ്റേഷനില്‍ പരാതി നല്‍കുകയും ചെയ്തു.
ഇതേത്തുടര്‍ന്ന് യുവാവിനെ പോലീസ് അറസ്റ്റു ചെയ്യുകയായിരുന്നു. ഉത്തര്‍പ്രദേശില്‍ മെഹ്നഗര്‍ പൊലീസ് സ്റ്റേഷന്‍ പരിധിയിലാണ് സംഭവം.
മോട്ടോര്‍ സൈക്കിള്‍ ആവശ്യപ്പെട്ട് ഭാര്യയെ പുനീത് സ്ഥിരമായി മര്‍ദ്ദിക്കാറുണ്ടായിരുന്നു. മര്‍ദ്ദനം സഹിക്കാന്‍ കഴിയാതെ വന്നതോടെ ഒരു ദിവസം യുവതി അവരുടെ വീട്ടിലേക്ക് പോയി.
ഇതില്‍ പ്രകോപിതനായ പുനീത് ഭാര്യയുടെ ചിത്രവും ഫോണ്‍ നമ്പറും സഹിതം ഒരു കുറിപ്പ് സോഷ്യല്‍മീഡിയയില്‍ പങ്കുവെയ്ക്കുകയായിരുന്നു.
ഇതിനെ തുടര്‍ന്ന് വിവിധയിടങ്ങളില്‍ നിന്ന് നിരവധി അസാധാരണമായ കോളുകള്‍ യുവതിയെ തേടി എത്തുകയായിരുന്നു. തുടര്‍ന്നാണ് യുവതി സംഭവം കണ്ടെത്തുന്നതും യുവാവിന്റെ അറസ്റ്റിലേക്ക് കാര്യങ്ങള്‍ എത്തുന്നതും.
