ഉദയം മുതല് അസ്തമയം വരെ മുസ്ലീങ്ങള് ഭക്ഷണപാനീയങ്ങള് ഉപേക്ഷിച്ച് വ്രതമനുഷ്ഠിക്കുന്ന റമദാൻ മാസം. ആത്മീയ നേട്ടങ്ങള്ക്കപ്പുറം, എല്ലാ നോമ്പ് വ്രതങ്ങളും, ശാരീരിക മാനസികാരോഗ്യത്തെ ഗുണപരമായി ബാധിക്കുമെന്ന് പഠനങ്ങള് തെളിയിക്കുന്നു. വിഷാദം, ഉത്കണ്ഠ, മാനസികസമ്മര്ദം എന്നിവ കുറയ്ക്കാന് വ്രതം സഹായിക്കുന്നു.
മിതത്വം, ആത്മനിയന്ത്രണം, ഭക്ഷണക്രമത്തിലെ ശ്രദ്ധ എന്നിവ ഇത് ശീലിപ്പിക്കുന്നു. ആരോഗ്യമുള്ള
മനസ്, ആരോഗ്യമുള്ള ശരീരത്തെ പരിപാലിക്കുന്നു. ശരീരത്തിന്റെ “പോഷകാഹാര ആവശ്യങ്ങള്’ വര്ഷത്തിലെ മറ്റ് മാസങ്ങളില് നിന്ന് വ്യത്യസ്തമല്ല; ഭക്ഷണത്തിന്റെ സമയക്രമത്തില് മാത്രമേ മാറ്റം വരുന്നുള്ളൂ.
വ്രതാനുഷ്ഠാനവും ശരീരവും
നോമ്പുസമയത്ത് ശരീരം ഊര്ജത്തിനായി ഗ്ലൂക്കോസിനുപകരം സംഭരിക്കപ്പെട്ട കൊഴുപ്പ് ദഹിപ്പിക്കാന് തുടങ്ങുന്നു. നോമ്പുസമയത്ത് ശരീരത്തില് സംഭവിക്കുന്ന ഈ മാറ്റത്തെ “മെറ്റബോളിക് ഷിഫ്റ്റ്’ (Metabolic Shift) എന്ന് വിളിക്കുന്നു. സാധാരണഗതിയില് നമ്മള് കഴിക്കുന്ന ഭക്ഷണത്തിലെ കാര്ബോഹൈഡ്രേറ്റുകളില് നിന്നുള്ള ഗ്ലൂക്കോസാണ് ശരീരം ഊര്ജത്തിനായി ഉപയോഗിക്കുന്നത്.
എന്നാല് നോമ്പുസമയത്ത് മണിക്കൂറുകളോളം ഭക്ഷണം ലഭിക്കാതെ വരുമ്പോള്, രക്തത്തിലെ ഗ്ലൂക്കോസിന്റെ അളവ് കുറയുന്നു. ഈ ഘട്ടത്തില് ശരീരം ഊര്ജത്തിനായി മറ്റ് വഴികള് തേടുകയും, ശരീരത്തില് നേരത്തെ തന്നെ അമിതമായി സംഭരിക്കപ്പെട്ടിട്ടുള്ള കൊഴുപ്പ് (Stored Fat) ദഹിപ്പിക്കാന് തുടങ്ങുകയും ചെയ്യുന്നു. കൊഴുപ്പ് ഇത്തരത്തില് ഊര്ജമായി മാറുന്ന ഈ സവിശേഷ അവസ്ഥയെയാണ് ‘കീറ്റോസിസ്’ (Ketosis) എന്ന് വിളിക്കുന്നത്.
ഈ പ്രക്രിയ മെറ്റബോളിക് ആരോഗ്യം മെച്ചപ്പെടുത്തുമെങ്കിലും, കൃത്യമായ പോഷകാഹാര പിന്തുണ ഇതിന് അത്യാവശ്യമാണ്. ആരോഗ്യം നിലനിര്ത്താന്, ഭക്ഷണം കഴിക്കുന്നതിലെ ‘മിതത്വം’ എന്ന മാന്ത്രിക മന്ത്രം മറക്കാതിരിക്കുക. നോമ്പുകാലസാഹചര്യത്തിനനുസരിച്ചുള്ള സമീകൃതമായ ഭക്ഷണക്രമം ശീലിക്കുക.
വ്രതസമയത്ത് ദാഹം അനുഭവപ്പെടുന്നത് സ്വാഭാവികമാണ്. തലവേദന, തളര്ച്ച എന്നിവ നിര്ജലീകരണത്തിന്റെ(Dehydration)ലക്ഷണമാകാം. ഇത് ഒഴിവാക്കാന് നോമ്പ് ഇല്ലാത്ത സമയങ്ങളില് ധാരാളം വെള്ളം കുടിക്കുക. ശരീരത്തില് ജലാംശം നിലനിര്ത്തുക.
(തുടരും)
