സ്കിൻകെയർ ബ്രാൻഡായ ‘വാസലിനെ’ കൊറിയൻ ഇൻഫ്ലുവൻസർ ‘ബേസ്ലൈൻ’ എന്ന് തെറ്റായി ഉച്ചരിച്ച വീഡിയോ സോഷ്യൽ മീഡിയയിൽ തരംഗമാകുന്നു. ഇൻസ്റ്റാഗ്രാം വിഡിയോയിലൂടെ കാണിച്ച ഉത്പ്പന്നങ്ങളെ ഇൻഫ്ലുവൻസറായ മിൻ ഡേ ‘ബേസ്ലൈൻ’ എന്ന് ആവർത്തിച്ചു വിളിച്ചതോടെയാണ് തമാശ രൂപത്തിലുള്ള ട്രോളുകൾ പ്രചരിക്കാൻ തുടങ്ങിയത്. സംഭവം വൈറലായതോടെ ബ്രാൻഡിന്റെ പേര് ഔദ്യോഗികമായി ‘ബേസ്ലൈൻ’ എന്ന് മാറ്റുകയാണെന്ന രസകരമായ പ്രതികരണവുമായി വാസലിൻ കമ്പനിയും രംഗത്തെത്തി.
ലോകമെമ്പാടുമുള്ള ആളുകൾ തങ്ങളുടെ ഉത്പ്പന്നത്തെ വിവിധ രീതിയിലാണ് ഉച്ചരിക്കുന്നതെന്നും, പ്രാദേശികമായ ഇത്തരം വ്യത്യാസങ്ങളെ സന്തോഷത്തോടെ സ്വീകരിക്കുന്നുവെന്നും കമ്പനി കൂട്ടിച്ചേർത്തു. വാസലിന്റെ ഈ ഹൃദ്യമായ പ്രതികരണത്തിന് മികച്ച പിന്തുണയാണ് നെറ്റിസൺസിൽ നിന്നും ലഭിക്കുന്നത്.
തന്റെ പക്കലുള്ള വാസലിൻ ഉൽപ്പന്നങ്ങൾ പ്രേക്ഷകർക്ക് പരിചയപ്പെടുത്തുന്നതിനിടെയാണ് മിൻ ഡേയ്ക്ക് അബദ്ധം സംഭവിച്ചത്. കൊറിയൻ ഭാഷയിൽ ‘V’ എന്ന അക്ഷരം ഉച്ചരിക്കാനുള്ള പ്രയാസം മൂലമാണ് അത് ‘B’ ആയി മാറിയതെന്ന് മറ്റൊരു വീഡിയോയിലൂടെ അവർ വ്യക്തമാക്കുകയും ചെയ്തു. 3.6 കോടിയിലധികം ആളുകളാണ് നിലവിൽ ഈ വീഡിയോ കണ്ടത്.
വീഡിയോ വൻ തോതിൽ പ്രചരിച്ചതോടെ, തങ്ങളുടെ പേര് ‘ബേസ്ലൈൻ’ എന്ന് മാറ്റുകയാണെന്നും, വീഡിയോ പങ്കുവെച്ച മിൻ ഡേയെ ബ്രാൻഡിന്റെ പുതിയ ‘സിഇഒ’ ആയി നിയമിക്കുകയാണെന്നും വാസലിൻ തമാശരൂപേണ സോഷ്യൽ മീഡിയയിൽ കുറിച്ചു.
