കഴിഞ്ഞ കുറച്ചുദിവസങ്ങളായി സമൂഹ മാധ്യമ പ്ലാറ്റ്ഫോമായ എക്സിൽ ഏറെ ചർച്ച ചെയ്യപ്പെട്ട പേരാണ് ജയ് സിംഗ് രാത്തോർ (Jay Singh Rathore). അനിയത്തിയുടെ കണ്ണിന്റെ ശസ്ത്രക്രിയക്കായി സഹായമഭ്യർഥിച്ച് വൻതുക തട്ടിയെടുത്ത 16 വയസുകാരനായ കൗമാരക്കാരനാണ് ഇതിന് പിന്നിലെന്ന് വെളിപ്പെട്ടതോടെയാണ് സംഭവം വാർത്തകളിൽ ഇടം നേടിയത്.
തന്റെ സഹോദരിക്ക് കാഴ്ചശക്തി നഷ്ടപ്പെടാതിരിക്കാൻ അടിയന്തിരമായി കണ്ണ് ശസ്ത്രക്രിയ നടത്തണമെന്ന് പറഞ്ഞാണ് ജയ് സിംഗ് രാത്തോർ എന്ന അക്കൗണ്ടിലൂടെ പണം അഭ്യർഥന നടത്തിയത്. ഇതിനായി ചികിത്സാ രേഖകളും പണം അയക്കേണ്ട വിവരങ്ങളും ചേർത്ത്
ഒരു പോസ്റ്റ് പങ്കുവെച്ചു. 24 മണിക്കൂറിനുള്ളിൽ 1,58,282 രൂപയോളമാണ് ഇയാൾ സമാഹരിച്ചത്. ആവശ്യത്തിന് പണം ലഭിച്ചെന്നും അതിനാൽ പോസ്റ്റുകൾ ഡിലീറ്റ് ചെയ്യുകയാണെന്നും ഇയാൾ പിന്നീട് അറിയിച്ചു.
എന്നാൽ, ഇയാൾ പങ്കുവെച്ച ചികിത്സാ രേഖകളിലെ ആശുപത്രിയായ ‘ഷ്രോഫ് ഐ സെന്റർ’ (Shroff Eye Centre) രംഗത്തെത്തിയതോടെയാണ് തട്ടിപ്പ് പുറത്തായത്. തങ്ങളുടെ ലെറ്റർഹെഡ് ദുരുപയോഗം ചെയ്ത് വ്യാജമായി ഉണ്ടാക്കിയ രേഖകളാണ് ഇതെന്നും ഇത്തരം തട്ടിപ്പുകളിൽ വീഴരുതെന്നും കാണിച്ച് ആശുപത്രി അധികൃതർ മുന്നറിയിപ്പ് നൽകി.
രേഖകൾ വ്യാജമാണെന്ന് തെളിഞ്ഞതോടെ എക്സ് സ്പേസിലൂടെ പണം നൽകിയവർ യുവാവിനെ ചോദ്യം ചെയ്തു. ചോദ്യം ചെയ്യലിൽ, താൻ പിരിച്ചെടുത്ത പണം അച്ഛന്റെ ചികിത്സയ്ക്കാണെന്നും അനിയത്തിയുടെ പേരിൽ വ്യാജമായി കഥ മെനയുകയായിരുന്നുവെന്നും ഇയാൾ കരഞ്ഞുകൊണ്ട് സമ്മതിച്ചു. അച്ഛന്റെ പേരിൽ സഹായം ചോദിച്ചപ്പോൾ ആളുകൾ ശ്രദ്ധിക്കാതിരുന്നതിനാലാണ് ഇത്തരമൊരു വ്യാജ പ്രചരണം നടത്തിയതെന്നാണ് യുവാവിന്റെ വിശദീകരണം.
സമാഹരിച്ച പണം മുഴുവൻ തിരികെ നൽകുമെന്നും നിലവിൽ ബാങ്ക് അക്കൗണ്ടിൽ താൽക്കാലിക പരിധിയുള്ളതിനാലാണ് താമസമെന്നും സെപ്റ്റംബർ 23ന് പങ്കുവെച്ച പോസ്റ്റിൽ ജയ് അവകാശപ്പെട്ടു. എങ്കിലും, തങ്ങളെ വഞ്ചിച്ച യുവാവിനെതിരെ പണം നൽകിയവരുടെ പ്രതിഷേധവും ആശങ്കയും സോഷ്യൽ മീഡിയയിൽ ഇപ്പോഴും തുടരുകയാണ്.
