ബംഗളൂരുവിൽ ഒറ്റയ്ക്ക് താമസിക്കുന്ന യുവതി ബന്ധുക്കളുടെ ചോദ്യങ്ങളിൽ നിന്ന് രക്ഷപ്പെടാൻ കണ്ടെത്തിയ വഴി കേട്ടാൽ ആരും ഒന്നു അമ്പരന്നുപോകും. നാട്ടിൽ നിന്നെത്തുന്ന ബന്ധുക്കൾ താൻ ഒറ്റയ്ക്കാണ് താമസിക്കുന്നത് കണ്ട് ചോദ്യം ചെയ്യുന്നത് ഒഴിവാക്കാൻ, കുറച്ചു ദിവസത്തേക്ക് കൂടെ നിൽക്കാൻ ഒരു ‘വ്യാജ റൂംമേറ്റിനെ’ തേടി യുവതി റെഡിറ്റിൽ പങ്കുവച്ച പോസ്റ്റാണ് ഇപ്പോൾ സോഷ്യൽ മീഡിയയിൽ വൈറലാകുന്നത്.
പകരം സൗജന്യ താമസമും ഭക്ഷണവും ഒരു സ്വകാര്യ റൂമുമാണ് യുവതി വാഗ്ദാനം ചെയ്തത്. ഈ വിചിത്രമായ ആവശ്യത്തിന് റെഡിറ്റിൽ ലഭിച്ചതാകട്ടെ 150-ലധികം സന്ദേശങ്ങളും. യുവതി പങ്കുവച്ച പോസ്റ്റിന്റെ തലക്കെട്ട് തന്നെ ഏറെ കൗതുകമുണർത്തുന്നതായിരുന്നു: “വ്യാജ റൂംമേറ്റിനെ (സ്ത്രീകൾ മാത്രം) കുറച്ചു ദിവസത്തേക്ക് ആവശ്യമുണ്ട്- സൗജന്യ താമസം, സ്നാക്സ് ഉൾപ്പെടെ നൽകാം, സ്ഥലം ബംഗളൂരു.”
തനിക്ക് 22 വയസായെന്നും ബന്ധുക്കൾ ബംഗളൂരു സന്ദർശിക്കാനെത്തുമ്പോൾ താൻ ഇത്രയും വലിയൊരു വീട്ടിൽ ഒറ്റയ്ക്ക് താമസിക്കുന്നത് കണ്ട് ചോദ്യം ചെയ്യും. അതുകൊണ്ട് എനിക്ക് ഒരു റൂംമേറ്റിനെ വേണം. ജീവനുള്ള ഒരു മനുഷ്യ റൂംമേറ്റിനെയാണ് വേണ്ടത്, മറ്റൊന്നുമല്ല താൽക്കാലികമായി, ആന്റിമാരുടെ വായടപ്പിക്കാൻ മാത്രം. ഇത് കണ്ടാൽ ആന്റിമാർ സംതൃപ്തിയോടെ തലയാട്ടി അടുത്ത വിഷയത്തിലേക്ക് കടക്കാൻ സാധ്യമാകും,” എന്ന് അവൾ തമാശയായി കുറിച്ചു.
വീട് പൂർണ സജ്ജീകരണമുള്ളതാണെന്നും താൽക്കാലികമായി എത്തുന്ന അതിഥിക്ക് സ്വകാര്യ മുറിയും സൗജന്യ വാടകയും ഭക്ഷണവും ലഭിക്കുമെന്നും പോസ്റ്റിൽ പറയുന്നു. ഏതാനും ദിവസങ്ങൾ മാത്രം നീണ്ടുനിൽക്കുന്ന ഈ കരാറിന് വീട്ടുജോലികളുടെ ഭാരമൊന്നുമില്ല. ബന്ധുക്കൾ വരുമ്പോൾ ഒരു സാധാരണ റൂംമേറ്റിനെപ്പോലെ പെരുമാറുക എന്നതാണ് പ്രധാന ആവശ്യം. ചോദ്യങ്ങൾക്ക് മറുപടി നൽകുക, ചിരിക്കുക, വീട്ടുജോലികൾ പങ്കിട്ടാണ് ജീവിക്കുന്നത് എന്ന തോന്നൽ ഉണ്ടാക്കുക എന്നിവയാണ് ചെയ്യേണ്ടതെന്നും യുവതി കുറിച്ചു.
