കൊച്ചി: തെരുവുനായ ശല്യത്തിന്റെ തീവ്രത തുറന്നുകാട്ടുന്ന ഹ്രസ്വചിത്രമായ “എന്റെ മീനാക്ഷി’യുടെ യൂടൂബ് റിലീസും പ്രിവ്യൂ ഷോയും നടത്തി. എറണാകുളം പ്രസ് ക്ലബിൽ നടന്ന ചടങ്ങിൽ വി ഗാർഡ് ഗ്രൂപ്പ് ചെയർമാൻ കൊച്ചൗസേപ്പ് ചിറ്റിലപ്പിള്ളി യൂടൂബ് റിലീസ് നിർവഹിച്ചു.
നമ്മുടെ അലസതകൊണ്ടാണു തെരുവുനായകൾ എന്ന വലിയ വിപത്ത് വളരുന്നതെന്നും മനുഷ്യസ്നേഹം കഴിഞ്ഞു മതി മൃഗസ്നേഹമെന്നും ചിത്രം ഓർമപ്പെടുത്തുന്നുവെന്നു കൊച്ചൗസേപ്പ് ചിറ്റിലപ്പിള്ളി ചൂണ്ടിക്കാട്ടി. സ്കൂളിലേക്കുപോകും വഴി ഒരു കുട്ടിക്കു തെരുവുനായയുടെ കടിയേൽക്കുന്നു.
തുടർന്നു പേ ബാധിച്ച കുഞ്ഞുമായി പിതാവ് ജീപ്പിൽ ആശുപത്രിയിലേക്കു പോകുന്നു. ഈ സമയം തെറ്റിദ്ധാരണമൂലം ചിലർ ഇവരെ വഴിയിൽ തടയുന്നതും പിതാവ് തന്റെ ദയനീയാവസ്ഥ വിവരിക്കുന്നതുമാണു ഹ്രസ്വചിത്രത്തിന്റെ ഇതിവൃത്തം.
ഫോട്ടോമാജിക് പ്രൊഡക്ഷൻസും ജിക്സി എന്റർടെയിൻസും ചേർന്നു നിർമിക്കുന്ന ചിത്രത്തിന്റെ രചനയും സംവിധാനവും നിർവഹിച്ചത് അനിൽ രാജ് ആണ്. ഷമ്മിതിലകൻ, മീനാക്ഷി, കൊച്ചൗസേഫ് ചിറ്റിലപ്പിള്ളി, ശബരിനാഥ്, രാജീവ്, സുനിൽ രാമചന്ദ്രൻ, ഇന്ദു, ബ്രിന്റ ബെന്നി തുടങ്ങിയവർ സിനിമയിൽ അഭിനയിക്കുന്നു.
അഖിൽ മ്യൂസംഗീതവും ബെന്നി ഫോട്ടോ മാജിക് കാമറയും റോയി പല്ലിശേരി മേക്കപ്പും നിർവഹിച്ചിരിക്കുന്നു. ഹ്രസ്വചിത്രത്തിലെ പ്രധാന കഥാപാത്രമായ ബാലതാരം ബേബി മീനാക്ഷി, സംവിധായകൻ അനിൽ രാജ് , ശബരിനാഥ്, ബെന്നി എന്നിവരും ചടങ്ങിൽ പങ്കെടുത്തു.