ജക്കാർത്ത: ഇന്തോനേഷ്യൻ തലസ്ഥാനമായ ജക്കാർത്തയിലെ ബഹുനിലക്കെട്ടിടത്തിലുണ്ടായ തീപിടിത്തത്തിൽ 20 പേർ മരിച്ചു. ഖനന, കാർഷികാവശ്യങ്ങൾക്കു ഡ്രോണുകൾ നല്കുന്ന ടെറാ ഡ്രോൺ എന്ന ജാപ്പനീസ് കന്പനിയുടെ ഇന്തോനേഷ്യൻ ഓഫീസ് സ്ഥിതി ചെയ്യുന്ന ഏഴു നിലക്കെട്ടിടത്തിൽ ഇന്നലെ ഉച്ചയ്ക്കാണു ദുരന്തമുണ്ടായത്.
ഒന്നാം നിലയിൽ ആരംഭിച്ച തീപിടിത്തം അതിവേഗം മറ്റു നിലകളിലേക്കു വ്യാപിച്ചു. ഉച്ചഭക്ഷണം കഴിച്ചുകൊണ്ടിരുന്ന ജീവനക്കാരിൽ ചിലർക്ക് ഏണികൾ ഉപയോഗിച്ച് രക്ഷപ്പെടാൻ കഴിഞ്ഞു. തീ അണച്ചുവെന്നാണ് ഇന്തോനേഷ്യൻ അധികൃതർ അറിയിച്ചത്. തുടർപരിശോധനയിൽ കൂടുതൽ മൃതദേഹങ്ങൾ കണ്ടെത്താൻ സാധ്യതയുണ്ട്.
