തൊടുപുഴ: ജില്ലയില് എല്പിജി വിതരണവുമായി ബന്ധപ്പെട്ട് അധികവില ഈടാക്കല്, വ്യാജവിപണി, ദുരുപയോഗം, കരിഞ്ചന്ത തുടങ്ങിയവയ്ക്കെതിരേ കര്ശന നടപടിയുമായി ജില്ലാ ഭരണകൂടം.
എല്പിജി വിതരണവുമായി ബന്ധപ്പെട്ട് നടപടികള് ഏകോപിപ്പിക്കുന്നതിനായി ജില്ലാ കളക്ടര് ഡോ. ദിനേശന് ചെറുവാട്ടിന്റെ അധ്യക്ഷതയില് ജില്ലാ സപ്ലൈ ഓഫീസര് കണ്വീനറായും പോലീസ്, ലീഗല് മെട്രോളജി, തദ്ദേശ സ്വയംഭരണം എന്നീ വകുപ്പുകളിലെ അംഗങ്ങളെയും ഓയില് കമ്പനി പ്രതിനിധികളെയും ഉള്പ്പെടുത്തി ജില്ലാതല ക്രൈസിസ് മാനേജ്മെന്റ് കമ്മിറ്റി രൂപീകരിച്ച് യോഗം ചേര്ന്നു.
സര്ക്കാര് നിര്ദേശം അനുസരിച്ച് ആശുപത്രികള്, അങ്കണവാടികള് അടക്കമുള്ള സ്കൂളുകള്, ശ്മശാനങ്ങള്, ഇന്ഡസ്ട്രിയല് കാന്റീനുകള്, സ്കൂള്-കോളജ് ഹോസ്റ്റലുകള്, കമ്യൂണിറ്റി കിച്ചണ്, സുഭിക്ഷ ഹോട്ടല്, വൃദ്ധസദനങ്ങള്, അനാഥാലയങ്ങള് എന്നീ മേഖലകള്ക്ക് മുന്ഗണന നല്കി പാചകവാതകം പൂര്ണമായും ലഭ്യമാക്കും.
ഹോട്ടലുകള്, റസ്റ്ററന്റുകള്, കാന്റീനുകള്, ഭക്ഷ്യസംസ്കരണ യൂണിറ്റുകള്, സര്ക്കാര്, തദ്ദേശ സ്ഥാപനങ്ങള് നടത്തുന്ന കിച്ചണുകള്, ഇതരസം സ്ഥാന തൊഴിലാളികള്ക്കുള്ള അഞ്ച് കിലോ എല്പിജി തുടങ്ങിയ അര്ധ മുന്ഗണനാ മേഖലകള്ക്ക് പ്രത്യേക ഇളവ് നല്കി അവരുടെ യഥാര്ഥ ആവശ്യകതയുടെ 40 ശതമാനം ലഭ്യമാക്കും. വാണിജ്യ എല്പിജി ആവശ്യങ്ങള്ക്കായി htips:/www.lptgrackerkerala. എന്ന വെബ്പോര്ട്ടലില് അപേക്ഷകള് സമര്പ്പിക്കാം.
വ്യാജവിപണി, ദുരുപയോഗം, കരിഞ്ചന്ത, അധികവില ഈടാക്കല് എന്നിവ ശ്രദ്ധയില്പ്പെട്ടാല് ബന്ധപ്പെട്ട അധികാരികളെ അറിയിക്കണമെന്നും ജില്ലാ സപ്ലൈ ഓഫീസര് അറിയിച്ചു. ഫോണ്: ജില്ലാ സപ്ലൈ ഓഫീസ് ഇടുക്കി -04862 232321, താലൂക്ക് സപ്ലൈ ഓഫീസ് തൊടുപുഴ -04862 222515, 9188527363, ഇടുക്കി – 04862 294975, 9188527364, പീരുമേട് -04869 232066, 9188527365, ഉടുമ്പന്ചോല -04868 232047, 9188527366, ദേവികുളം -04865 264224, 9188527367.
