അമ്പലപ്പുഴ: മത മൈത്രിയുടെ സന്ദേശമുയർത്തി അയ്യപ്പൻ്റെ മാതൃസ്ഥാനീയരായ അമ്പലപ്പുഴ ക്ഷേത്രത്തിൽ എരുമേലി വാവര് മസ്ജിദിൻ്റെ നേതൃത്വത്തിൽ അയ്യപ്പ ഭക്തർക്കായി അന്നദാനം.
അമ്പലപ്പുഴ യോഗം പേട്ട സംഘത്തിൻ്റെ നേതൃത്വത്തിൽ നടക്കുന്ന അന്നദാനത്തിൻ്റെ ഇരുപത്തിഒന്നാം ദിവസമായ ഞായറാഴ്ചയാണ് പതിവ് തെറ്റിക്കാതെ എരുമേലി വാവർ മസ്ജിദ് ഭാരവാഹികൾ വഴിപാടായി ക്ഷേത്രത്തിൽ അന്നദാനം നടത്തിയത്.
ഏതാണ്ട് ഒന്നരപ്പതിറ്റാണ്ടിലേറെയായി ഈ അന്നദാനം മുറതെറ്റാതെ ഇവർ നടത്തിവരികയാണ്. അയ്യപ്പനും വാവരും തമ്മിലുള്ള ബന്ധം ഊട്ടിയുറപ്പിക്കുന്നതിൻ്റെ പ്രതീകമായാണ് ജാതി മത വേർതിരിവുകളില്ലാതെ എരുമേലി മസ്ജിദ് ഭാരവാഹികൾ അമ്പലപ്പുഴ ശ്രീകൃഷ്ണ സ്വാമി ക്ഷേത്രത്തിൽ അന്നദാനം നടത്തുന്നത്.
അയ്യപ്പഭക്തരും ക്ഷേത്രത്തിൽ ദർശനത്തിനെത്തിയ ഭക്തരുമടക്കം ആയിരത്തി അഞ്ഞൂറിലേറെപ്പേർക്കാണ് അന്നദാനം നൽകിയത്. മസ്ജിദ് സെക്രട്ടറി മിഥു ലാജ്, സി.എം. അബ്ദുൾ നിസാർ., ഷഹനാസ്, വാവര് പ്രതിനിധി ആസാദ് താഴത്തു വീട്ടിൽ എന്നിവരുടെ നേതൃത്വത്തിലാണ് അന്നദാന വഴിപാട് നടത്തിയത്.
