കുണ്ടറ: പേരയം കുന്പളത്ത് വീടിന്‍റെ വാതിൽ തകർത്ത് 22 പവന്‍റെ സ്വർണാഭരണങ്ങൾ കവർന്ന സഹോദരങ്ങളായ മോഷ്ടാക്കളെ കുണ്ടറ പോലീസ് അറസ്റ്റു ചെയ്തു. കുന്പളത്തെ മേരി വിലാസം ക്ലീറ്റസിന്‍റെ വീട്ടിലാണ് മോഷണം നടന്നത്. കുന്പളം പാവോട്ടുമൂല സൈജു ഭവനിൽ സൈജു(28), സൈജുവിന്‍റെ ഇളയ സഹോദരൻ അനീഷ്(23) എന്നിവറാണ് പിടിയിലായത്. കഴിഞ്ഞ രണ്ടിന് വൈകുന്നേരം ആറിനും രാത്രി എട്ടിനും മധ്യേയായിരുന്നു മോഷണം.
കുന്പളം പള്ളിപ്പെരുന്നാളിന് പങ്കെടുക്കാനായി ക്ലീറ്റസും കുടുംബവും വീടുപൂട്ടി പോയിരിക്കുകയായിരുന്നു. വീടിനു പിന്നിലെ ഗ്രില്ലിൽ പിടിച്ചു കയറി രണ്ടാം നിലയിലെ വാതിൽ കുത്തിത്തുറന്ന് അകത്തു കയറിയ പ്രതികൾ അലമാരിയിൽ സൂക്ഷിച്ചിരുന്ന സ്വർണനാണയങ്ങളും സ്വർണാഭരണങ്ങളുമാണ് മോഷ്ടിച്ചത്.
പണയമെടുക്കുന്ന സ്ഥാപനങ്ങളും സ്വർണക്കടകളും കേന്ദ്രീകരിച്ച് നടത്തിയ അന്വേഷണത്തിലാണ് മോഷ്ടാക്കൾ പിടിയിലായത്.മോഷ്ടിച്ച സ്വർണാഭരണങ്ങൾ സ്വന്തം വീടിനു സമീപം കുഴിച്ചിട്ടിരുന്നു. ഒരു നാണയം കുണ്ടറയിലെ പണയമെടുപ്പ് സ്ഥാപനത്തിൽ പണയം വച്ചു. ഇതാണ് പ്രതികളെ പിടികൂടാൻ പോലീസിനെ സഹായിച്ചത്. കുഴിച്ചിട്ടിരുന്ന സ്വർണം പോലീസ് കണ്ടെടുത്തു.
