റോഡ് നിയമങ്ങൾ പാലിച്ചുകൊണ്ടാകണം നിരത്തിലൂടെ വാഹനം ഓടിക്കാവൂ എന്ന് പറയുന്നതു പോലെ കുറച്ച് മര്യാദകളും വാഹനം ഓടിക്കുന്പോൾ നമ്മൾ പാലിക്കേണ്ടതായുണ്ട്. എതിർ വശത്ത് വരുന്നവരെ മാനിച്ചുകൊണ്ടാകണം ഓരോരുത്തരും സഞ്ചരിക്കാൻ എന്നും പറയും. അതിനു വിഭിന്നമായൊരു സംഭവം നോയിഡയിൽ കഴിഞ്ഞ ദിവസം നടന്നു. ഇതിന്റെ വീഡിയോ സോഷ്യൽ മീഡിയയിൽ വൈറലായി. @noidapolice എന്ന എക്സ് പേജിലാണ് സംഭവത്തിന്റെ വീഡിയോ പങ്കുവച്ചിരിക്കുന്നത്.
നോയിഡ നഗരത്തിലൂടെ രാത്രി സ്ത്രീകൾ ഉൾപ്പെടെയുള്ള ഒരു കുടുംബം കാറിൽ യാത്ര ചെയ്യുകയായിരുന്നു. അപ്പോൾ എതിർ വശത്ത് കൂടി മറ്റൊരു കാറു വന്നു. ആ കാറിൽ ഇരുന്ന പുരുഷൻമാർ കുടുംബത്തിനു നേരേ അശ്ലീല ചുവയുള്ള ആഗ്യംങ്ങളും ഫ്ലൈയിംഗ് കിസുമെല്ലാം കൊടുക്കുന്നു. യുവാക്കളുടെ ഈ പ്രവർത്തി ഇഷ്ടപ്പെടാതെ വന്നതോടെ കുടുംബാംഗങ്ങൾ അവരുടെ വീഡിയോ എടുക്കാൻ തുടങ്ങി. വീഡിയോ എടുക്കുന്നു എന്ന് അറിഞ്ഞതോടെ യുവാക്കളുടെ ചെയ്തികൾ ഒന്നു കൂടി ഭീകരമാക്കി. നിങ്ങൾ വീഡിയോ എടുത്തോളൂ ഞങ്ങൾ ഇത് കാണിക്കുക തന്നെ ചെയ്യും എന്ന ഭാവത്തോടെ വീണ്ടും വീണ്ടും അവർ ഇത് തുടർന്നു.
വീഡിയോ വൈറലായതോടെ നിരവധി ആളുകളാണ് കമന്റുമായി എത്തിയത്. യുവാക്കൾക്ക് തക്കതായ ശിക്ഷ ലഭിക്കുന്നത് വരെ എല്ലാ സോഷ്യൽ മീഡിയ പ്ലാറ്റ്ഫോമുകളിലും പരമാവധി ഈ വീഡിയോ ഷെയർ ചെയ്യണമെന്നാണ് പലരും കുറിച്ചത്. സംഭവം നോയിഡ പോലീസിന്റെ ശ്രദ്ധയിൽപ്പെട്ടു. അവർ ഇതിനെക്കുറിച്ച് അന്വേഷിക്കുകയും രണ്ട് പേരെ അറസ്റ്റ് ചെയ്യുകയും ചെയ്തു.
