ജീവൻ പണയം വെച്ചുകൊണ്ടുള്ള സ്കൂൾ വിദ്യാർഥികളുടെ അപകടകരമായ ബൈക്ക് റൈഡിന്റെ വീഡിയോ സോഷ്യൽ മീഡിയയിൽ കടുത്ത പ്രതിഷേധത്തിന് വഴിവെക്കുന്നു. ഉത്തർപ്രദേശിലെ മീററ്റിലാണ് ഒരൊറ്റ മോട്ടോർ സൈക്കിളിൽ ആറ് വിദ്യാർഥികൾ ചേർന്ന് തിങ്ങിഞെരുങ്ങി യാത്ര ചെയ്തത്.
വീഡിയോയിൽ അഞ്ച് ആൺകുട്ടികൾ ബൈക്കിലിരുന്ന് യാത്ര ചെയ്യുന്നത് കാണാം. എന്നാൽ ഇതിനെക്കാൾ ഞെട്ടിക്കുന്ന കാഴ്ച, ആറാമത്തെ വിദ്യാർഥി ബൈക്കിലിരിക്കുന്ന മറ്റൊരു കുട്ടിയുടെ തോളിൽ ബാലൻസ് ചെയ്ത് കയറി ഇരിക്കുന്നതാണ്. തെരക്കേറിയ റോഡിലൂടെ യാതൊരു സുരക്ഷയുമില്ലാതെയാണ് ഇവരുടെ ഈ അപകടകരമായ അഭ്യാസപ്രകടനം.
വീഡിയോ സോഷ്യൽ മീഡിയയിൽ വൈറലായതോടെ മീററ്റ് ട്രാഫിക് പോലീസ് വിഷയത്തിൽ ശക്തമായ അന്വേഷണവും നടപടിയും ആരംഭിച്ചു.
അപകടകരമായ രീതിയിൽ വാഹനം ഓടിച്ചതിന് ബൈക്കിന് 25,000 രൂപ പിഴ ചുമത്തിയതായി മീററ്റ് ട്രാഫിക് പോലീസ് സൂപ്രണ്ട് രാജേഷ് കുമാർ ശ്രീവാസ്തവ അറിയിച്ചു. വാഹനം കണ്ടുകെട്ടാനുള്ള നടപടികൾ പുരോഗമിക്കുകയാണ്.
കുട്ടികൾ ഇത്തരം അപകടകരമായ കൃത്യങ്ങളിൽ ഏർപ്പെടുന്നതിന് പൂർണ ഉത്തരവാദികൾ അവരുടെ മാതാപിതാക്കളാണെന്നും, പ്രായപൂർത്തിയാകാത്ത കുട്ടികൾക്ക് വാഹനം നൽകിയ മാതാപിതാക്കൾക്കെതിരെയും ശക്തമായ നിയമനടപടികൾ സ്വീകരിച്ചു വരികയാണെന്നും പോലീസ് വ്യക്തമാക്കി.
