കല്പറ്റ: വയനാട് മുണ്ടക്കൈ, ചൂരൽമല ഉരുള്പൊട്ടൽ ദുരന്തബാധിതര്ക്കായുള്ള ടൗണ്ഷിപ്പ് നാടിനു സമർപ്പിച്ച് മുഖ്യമന്ത്രി പിണറായി വിജയൻ. ടൗണ്ഷിപ്പിൽ ആദ്യഘട്ടത്തിൽ നിര്മാണം പൂര്ത്തിയായ 178 വീടുകളുടെ താക്കോൽ ദുരന്തബാധിതര്ക്ക് കൈമാറി.
ചടങ്ങിനു മുമ്പായി കല്പ്പറ്റയിലെ ബൈപ്പാസ് റോഡിലെ ടൗണ്ഷിപ്പിലെ നിര്മാണം പൂര്ത്തിയായ വീട് മുഖ്യമന്ത്രി സന്ദര്ശിച്ചു. തുടർന്ന് ടൗണ്ഷിപ്പിന്റെ ഉദ്ഘാടനവും ഗുണഭോക്താക്കള്ക്കുള്ള പട്ടയ വിതരണവും അദ്ദേഹം നിര്വഹിച്ചു.
അടുത്ത മഴയ്ക്ക് മുന്പ് ഉരുള്പൊട്ടൽ ദുരന്തബാധിതരായ എല്ലാവര്ക്കും വീട് കൈമാറുമെന്ന് അദ്ദേഹം അറിയിച്ചു. സമൂഹത്തിലെ നിരവധി ആളുകൾ ദുരന്ത ബാധിതരെ സഹായിക്കാൻ സന്നദ്ധരായെന്നും സഹായം വാഗ്ദാനം ചെയ്ത പലരും വാക്ക് നിറവേറ്റിയെന്നും മുഖ്യമന്ത്രി പറഞ്ഞു. ദുരന്തത്തില് വീട് പൂര്ണമായി നഷ്ടപ്പെട്ട 178 കുടുംബങ്ങള്ക്കാണ് ആദ്യഘട്ടത്തില് വീട് നല്കിയത്.
