അമേരിക്കയിലെയും ഇന്ത്യയിലെയും ഗതാഗത സംസ്കാരവും ഡ്രൈവർമാരുടെ പെരുമാറ്റവും തമ്മിലുള്ള വ്യത്യാസം ചൂണ്ടിക്കാട്ടി മലയാളി. യുവാവ് പങ്കുവെച്ച വീഡിയോ സോഷ്യൽ മീഡിയയിൽ വൻ ചർച്ചയാകുന്നു. അമേരിക്കയിൽ ജീവിക്കുന്ന ഹർഷ് എന്ന യുവാവാണ് ഇൻസ്റ്റാഗ്രാമിലൂടെ തനിക്ക് നേരിട്ട അനുഭവം പങ്കുവെച്ചത്.
റോഡപകടത്തെ തുടർന്ന് വൻ ഗതാഗതക്കുരുക്ക് ഉണ്ടായിട്ടും ക്ഷമയോടെ കാത്തുനിൽക്കുന്ന അമേരിക്കൻ ഡ്രൈവർമാരുടെ വീഡിയോയാണ് ഇദ്ദേഹം ചിത്രീകരിച്ചത്.
“അമേരിക്കയും ഇന്ത്യയും ട്രാഫിക് ബ്ലോക്കുകളെ എങ്ങനെ നേരിടുന്നു എന്നതിലെ വ്യത്യാസം” എന്ന അടിക്കുറിപ്പോടെയാണ് ഹർഷ് വീഡിയോ പങ്കുവെച്ചത്.ഒരു റോഡപകടത്തെ തുടർന്ന് വാഹനങ്ങളുടെ നീണ്ട നിര തന്നെ റോഡിൽ കുടുങ്ങിക്കിടക്കുന്നത് വീഡിയോയിൽ കാണാം.
എന്നാൽ ഇത്രയും വലിയ ബ്ലോക്ക് ഉണ്ടായിട്ടും വാഹനങ്ങൾ തമ്മിൽ കൃത്യമായ അകലം പാലിക്കുകയും, ആരും ഹോൺ അടിക്കാതെ ക്ഷമയോടെ കാത്തിരിക്കുകയുമാണ്.
“ഇന്ത്യയിലാണെങ്കിൽ അല്പം സമയം കഴിയുമ്പോഴേക്കും ‘പീപ്പ്, പീപ്പ്’ എന്ന് ഹോൺ അടി ബഹളം തുടങ്ങും. എന്നാൽ ഇവിടെ ആരും ഹോൺ അടിക്കുന്നില്ല, തിരക്ക് കൂട്ടുന്നുമില്ല. വളരെ ക്ഷമയോടെയാണ് അവർ വാഹനം ഓടിക്കുന്നത്,” എന്ന് ഹർഷ് വീഡിയോയിൽ പറയുന്നു.
മറ്റു വാഹനങ്ങളെ വെട്ടിച്ച് മുന്നിൽ കയറാനോ പുതിയ ലൈനുകൾ ഉണ്ടാക്കി ഗതാഗതം കൂടുതൽ സങ്കീർണമാക്കാനോ ആരും ശ്രമിക്കുന്നില്ലെന്നും, ഡ്രൈവർമാരുടെ ഈ പൗരബോധം തന്നെ ഏറെ ആകർഷിച്ചെന്നും അദ്ദേഹം കൂട്ടിച്ചേർത്തു. എത്ര വെപ്രാളം കാണിച്ചാലും ബ്ലോക്ക് മാറാതെ മുന്നോട്ട് പോകാൻ കഴിയില്ലെന്ന് അവിടുത്തെ ഡ്രൈവർമാർക്ക് നന്നായി അറിയാമെന്നും ഹർഷ് നിരീക്ഷിക്കുന്നു.
വീഡിയോ നിമിഷങ്ങൾക്കകം വൈറലായതോടെ സമ്മിശ്ര പ്രതികരണങ്ങളാണ് സോഷ്യൽ മീഡിയയിൽ ഉയരുന്നത്. അമേരിക്കയിലെ റോഡ് അച്ചടക്കത്തെയും ഡ്രൈവർമാരുടെ ക്ഷമയെയും ഭൂരിഭാഗം പേരും പ്രശംസിച്ചപ്പോൾ, ഇന്ത്യയെയും അമേരിക്കയെയും തമ്മിൽ താരതമ്യം ചെയ്യുന്നത് ശരിയല്ലെന്ന് വാദിക്കുന്നവരുമുണ്ട്.
എന്തൊക്കെയായാലും, റോഡിലെ അനാവശ്യമായ ഹോൺ അടിയും വെപ്രാളവും ഒഴിവാക്കാൻ ഇനിയും നമ്മൾ മാറേണ്ടതുണ്ടെന്ന ഓർമപ്പെടുത്തലാണ് ഈ വീഡിയോ നൽകുന്നത്.
