കോളജ് പരിപാടിക്കിടെ സിനിമാ ഡയലോഗ് പറഞ്ഞ് കളിയാക്കാൻ ശ്രമിച്ച വിദ്യാർഥിയുടെ കോളറിൽ കയറിപ്പിടിച്ച് ഭീഷണിപ്പെടുത്തി പ്രഫസർ. അഹമ്മദാബാദിലെ നിർമ യൂണിവേഴ്സിറ്റിയിൽ നടന്ന ടെക്നിക്കൽ ഫെസ്റ്റിനിടെയാണ് സദസിനെ മുഴുവൻ ഞെട്ടിച്ച നാടകീയ സംഭവങ്ങൾ അരങ്ങേറിയത്.
യൂണിവേഴ്സിറ്റിയുടെ ഇലക്ട്രോണിക്സ് ആൻഡ് ഇൻസ്ട്രുമെന്റേഷൻ എൻജിനീയറിങ് വിഭാഗം സംഘടിപ്പിച്ച ‘ടെക്നോഫോറ 2026’ എന്ന പരിപാടിക്കിടെയാണ് സംഭവം. സ്റ്റാൻഡ്-അപ്പ് കൊമേഡിയൻ രജത് സൂദ് പങ്കെടുത്ത പരിപാടിയിൽ, ഇലക്ട്രോണിക്സ് വിഭാഗം മേധാവിയായ ഡോ. ഹിമാൻഷു പട്ടേൽ ഫോണിൽ നിന്ന് എന്തോ വായിച്ച് പ്രസംഗിക്കുകയായിരുന്നു.
പ്രൊഫസർ വളരെ സാവധാനത്തിൽ വായിക്കുന്നത് കണ്ട് സദസ്സിലിരുന്ന ഒരു വിദ്യാർഥി ‘ഗോൽമാൽ 3’ എന്ന ഹിന്ദി ചിത്രത്തിലെ തമാശ രൂപത്തിലുള്ള “ജൽദി ബോൽ, കൽ സുബഹ് പൻവേൽ നികൽനാ ഹൈ” (വേഗം പറയ്, നാളെ രാവിലെ പൻവേലിൽ പോകാനുള്ളതാണ്) എന്ന പ്രശസ്തമായ ഡയലോഗ് ഉറക്കെ വിളിച്ചു പറഞ്ഞു.
തുടർന്ന് പ്രകോപിതനായ പ്രൊഫസർ “എന്നാൽ നീ ഇറങ്ങിപ്പോടാ” എന്ന് മറുപടി നൽകുകയും, കൈവിശദീകരിച്ച് വിദ്യാർഥിയെ സ്റ്റേജിലേക്ക് വിളിച്ചുവരുത്തുകയുമായിരുന്നു. സ്റ്റേജിലെത്തിയ വിദ്യാർഥിയുടെ കോളറിൽ പരസ്യമായി കയറിപ്പിടിച്ച പ്രൊഫസർ കടുത്ത ഭാഷയിലാണ് മുന്നറിയിപ്പ് നൽകിയത്.
“നിന്റെ പ്രശ്നം എന്താണ്? എനിക്ക് ഏത് അറ്റം വരെയും പോകാൻ കഴിയും. നിർമ യൂണിവേഴ്സിറ്റിയിലെ ഏതെങ്കിലും അധ്യാപകരെ അപമാനിക്കാൻ തുനിഞ്ഞാൽ നിന്റെ ഭാവി തകരും,” എന്ന് പ്രഫസർ ദേഷ്യത്തോടെ പറയുന്നത് വൈറലായ വീഡിയോയിൽ വ്യക്തമാണ്.
26 വർഷമായി യൂണിവേഴ്സിറ്റിയിൽ സേവനമനുഷ്ഠിക്കുന്ന മുതിർന്ന അധ്യാപകനാണ് ഡോ. ഹിമാൻഷു പട്ടേൽ. സംഭവത്തെക്കുറിച്ച് മാധ്യമങ്ങൾ ചോദിച്ചെങ്കിലും പ്രതികരിക്കാൻ അദ്ദേഹം തയ്യാറായില്ല.
അതേസമയം, വീഡിയോ സോഷ്യൽ മീഡിയയിൽ പ്രചരിച്ചതോടെ വലിയ രീതിയിലുള്ള വാദപ്രതിവാദങ്ങളാണ് ഉയരുന്നത്. വിദ്യാർത്ഥി അച്ചടക്കലംഘനം നടത്തിയാലും ഒരു അധ്യാപകൻ പരസ്യമായി കോളറിൽ പിടിക്കുന്നത് തെറ്റാണെന്നും പ്രൊഫഷണലായി കൈകാര്യം ചെയ്യണമായിരുന്നു എന്നും ഒരു വിഭാഗം വാദിക്കുമ്പോൾ, അധ്യാപകരോടുള്ള ബഹുമാനമില്ലായ്മയ്ക്ക് ഇത്തരം ശിക്ഷകൾ ആവശ്യമാണെന്നാണ് മറ്റുള്ളവരുടെ അഭിപ്രായം.
