നിങ്ങളുടെ ഫോണിലേക്ക് ഒരു കോൾ വന്നാൽ, അത് ആരാണെന്ന് അറിയാൻ നമ്പർ നോക്കും. ചിലപ്പോൾ ട്രൂകോളർ ഉപയോഗിക്കും. ഫോൺ ചോർത്തപ്പെടുമോ, സംഭാഷണങ്ങൾ മറ്റാരെങ്കിലും കേൾക്കുമോ എന്നൊരു പേടിയൊക്കെ നമുക്കുണ്ടാവാറുണ്ട്.
രാജ്യത്തിന്റെ പ്രധാനമന്ത്രി സംസാരിക്കുന്ന കാര്യം എപ്പോഴെങ്കിലും ചിന്തിച്ചിട്ടുണ്ടോ? രാജ്യസുരക്ഷയെ ബാധിക്കുന്ന നിർണായക തീരുമാനങ്ങൾ… പ്രതിരോധ രഹസ്യങ്ങൾ… അതീവ പ്രധാനപ്പെട്ട ഔദ്യോഗിക നിർദേശങ്ങൾ…ഇത്തരം വിവരങ്ങൾ കൈമാറുമ്പോൾ സാധാരണ മൊബൈൽ ഫോണുകളെ ആണോ ആശ്രയിക്കുന്നത്? ഇവിടെയാണ് ഇന്ത്യയുടെ RAX എന്ന പ്രത്യേക ആശയവിനിമയ സംവിധാനത്തിന്‍റെ പ്രസക്തി.
പ്രധാനമന്ത്രി നരേന്ദ്ര മോദി അതിപ്രധാനവും രഹസ്യസ്വഭാവമുള്ളതുമായ ഔദ്യോഗിക ആശയവിനിമയങ്ങൾക്കായി ഉപയോഗിക്കുന്ന അതീവ സുരക്ഷയുള്ള ഫോൺ സംവിധാനമാണ് Restricted Area Exchange അല്ലെങ്കിൽ Restricted Access Exchange അഥവാ റാക്സ് ഫോൺ. സാധാരണക്കാർക്ക് വിപണിയിൽ ലഭ്യമായ സ്മാർട്ട്ഫോണുകളല്ല ഇത്. കേന്ദ്ര സർക്കാരിന്‍റെ ടെലികോം ഗവേഷണ സ്ഥാപനമായ സി-ഡോട്ട് ആണ് ഈ ഫോണുകൾ വികസിപ്പിച്ചെടുത്തത്. ജിയോ, എയർടെൽ തുടങ്ങിയ സാധാരണ മൊബൈൽ നെറ്റ്‌വർക്കുകളിലല്ല ഇത് പ്രവർത്തിക്കുന്നത്. പകരം സുരക്ഷിതമായ പ്രത്യേക സർക്കാർ/സൈനിക ഫ്രീക്വൻസിയിലാണ് ഇവ പ്രവർത്തിക്കുന്നത്.
ഏറ്റവും ശ്രദ്ധേയമായ കാര്യമെന്തെന്നാൽ ആശയവിനിമയത്തിന് End-to-End Encryption ഉറപ്പാക്കുക എന്നതായിരുന്നു ഈ സംവിധാനത്തിന്‍റെ പ്രധാന ലക്ഷ്യം. അതായത്, ഫോൺ സംഭാഷണങ്ങൾ അനധികൃതമായി ചോർത്തപ്പെടുന്നത് തടയുന്നതിനുള്ള സുരക്ഷാ സംവിധാനങ്ങൾ.
ഒരു രാജ്യത്തിന്റെ പ്രധാനമന്ത്രി സംസാരിക്കുന്ന ഓരോ വാക്കിനും ചിലപ്പോൾ വലിയ രാഷ്ട്രീയ, നയതന്ത്ര, പ്രതിരോധ പ്രാധാന്യമുണ്ടാകും.അത്തരം സംഭാഷണങ്ങൾ സുരക്ഷിതമായിരിക്കണം എന്നത് വെറുമൊരു സാങ്കേതിക ആവശ്യമല്ല. അത് രാജ്യസുരക്ഷയുടെ ഭാഗമാണ്.സാധാരണക്കാർക്ക് ഒരു ഫോൺ എന്നത് ആശയവിനിമയത്തിനുള്ള ഉപകരണം മാത്രമായിരിക്കാം.
എന്നാൽ ഭരണകൂടത്തെ സംബന്ധിച്ചിടത്തോളം, ഒരു സുരക്ഷിത ഫോൺ എന്നത് നിർണായകമായ വിവരങ്ങൾ സംരക്ഷിക്കാനുള്ള സംവിധാനമാണ്.
കാവ്യാ ദേവദേവൻ
