ഹിന്ദി സിനിമകളോടും ഗാനങ്ങളോടുമുള്ള തന്‍റെ സ്നേഹംകൊണ്ട് സോഷ്യൽ മീഡിയയിൽ തരംഗമായിരിക്കുകയാണ് ജോർജ്ജിയയിൽ നിന്നുള്ള ഒരു ഇൻസ്റ്റാഗ്രാം ക്രിയേറ്റർ. ‘anamaria_eva_’ എന്ന ഇൻസ്റ്റാഗ്രാം പേജിലൂടെ പങ്കുവെച്ച വീഡിയോകൾക്ക് ലക്ഷക്കണക്കിന് കാഴ്ചക്കാരെയാണ് ലഭിക്കാറുള്ളതെങ്കിൽ, അവളുടെ ഏറ്റവും പുതിയ വീഡിയോ ഇതിനോടകം തന്നെ 36 ദശലക്ഷത്തിലധികം (3.6 കോടി) ആളുകളാണ് കണ്ടിരിക്കുന്നത്.
പ്രശസ്തമായ ‘ദിൽവാലെ ദുൽഹനിയ ലേ ജായേംഗെ’ എന്ന ചിത്രത്തിലെ ‘ഡോളി സജാ കെ രഖ്ന’ എന്ന ഗാനത്തിന് അതിമനോഹരമായ ഭാവങ്ങളോടെ നൃത്തം ചെയ്യുന്നതാണ് വീഡിയോയിലുള്ളത്. ഗാനത്തോടൊപ്പം ചുണ്ടനങ്ങുന്നതിനൊപ്പം ഗൃഹാതുരത ഉണർത്തുന്ന മികച്ച എക്സ്പ്രഷനുകളും കാഴ്ചവെച്ചാണ് ആരാധകരെ നേടിയെടുത്തിരിക്കുന്നത്. വീഡിയോയുടെ പശ്ചാത്തലത്തിൽ, കുടുംബത്തിലെ മുതിർന്ന ഒരാൾക്കൊപ്പം തീ കത്തിച്ച് കൈകൾ ചൂടാക്കുന്ന ദൃശ്യങ്ങളും കാണാം.
ഇന്ത്യൻ സംഗീതത്തോടും പ്രത്യേകിച്ച് ഷാരൂഖ് ഖാൻ – കാജോൾ ചിത്രങ്ങളോടുമുള്ള ആരാധകരുടെ ഇഷ്ടം വെളിപ്പെടുത്തുന്നതാണ് വീഡിയോയ്ക്ക് ലഭിച്ച പ്രതികരണങ്ങൾ. 60,000-ത്തിലധികം കമന്‍റുകളാണ് ഈ വീഡിയോയ്ക്ക് ഇതിനോടകം ലഭിച്ചിരിക്കുന്നത്. യുവതിയും മുതിർന്ന വ്യക്തിയും തമ്മിലുള്ള സ്നേഹബന്ധവും നിരവധി പേരുടെ മനംകവർന്നു.
“ഇതാണ് യഥാർഥ ലോകം, എല്ലാവരും പരസ്പരം സ്നേഹിക്കുന്നു. അതിരുകളില്ലാത്ത ഒരു ലോകത്തിനായി ഞാൻ പ്രാർത്ഥിക്കുന്നു,” എന്ന് ഒരു ഉപയോക്താവ് കുറിച്ചു. “എന്‍റെ ഇന്‍റർനെറ്റ് വളരെ മികച്ച രീതിയിലാണ് ഉപയോഗിക്കപ്പെടുന്നത്. കുട്ടി, നിങ്ങൾ ഞങ്ങളെ സന്തോഷിപ്പിക്കുന്നു,” എന്ന് മറ്റൊരാളും കമന്‍റ് ചെയ്തു. മുതിർന്ന വ്യക്തിയുടെ കണ്ണുകളിലെ സ്നേഹം വളരെ വിലപ്പെട്ടതാണെന്നും നിരവധി പേർ അഭിപ്രായപ്പെടുന്നുണ്ട്. ബോളിവുഡ് സംഗീതത്തിന് അതിരുകളില്ലെന്ന് ഒരിക്കൽ കൂടി തെളിയിച്ചിരിക്കുകയാണ് ജോർജ്ജിയൻ യുവതിയുടെ ഈ മനോഹരമായ വീഡിയോ.
