പാർലമെന്റിലെ തന്റെ വിടവാങ്ങൽ പ്രസംഗം അവിസ്മരണീയമായ ഒരു വിവാഹാഭ്യർഥനയാക്കി മാറ്റി ഓസ്ട്രേലിയൻ എംപി. പത്ത് വർഷത്തിലേറെയായി തന്റെ പങ്കാളിയായ നതാലി ഹിസ്സിയോടാണ് സഹപ്രവർത്തകരായ നിയമസഭാംഗങ്ങളെ സാക്ഷിയാക്കി അദ്ദേഹം വിവാഹാഭ്യർഥന നടത്തിയത്.
സിഡ്നിയിലെ റൈഡ് മണ്ഡലത്തെ പ്രതിനിധീകരിക്കുന്ന എംപിയായ ജോർദാൻ ലെയ്ൻ ആണ് നവംബർ 19-ന് ന്യൂ സൗത്ത് വെയിൽസ് പാർലമെന്റിൽ തന്റെ വിടവാങ്ങൽ പ്രസംഗം നടത്തുന്നതിനിടെ നാടകീയമായ ഈ രംഗങ്ങൾക്ക് തുടക്കമിട്ടത്.
പബ്ലിക് ഗാലറിയിലിരുന്ന് പ്രസംഗം വീക്ഷിക്കുകയായിരുന്ന നതാലിയെ അഭിസംബോധന ചെയ്തുകൊണ്ട് പ്രസംഗത്തിലെ അവസാന ചോദ്യം ഉന്നയിച്ചപ്പോൾ സഭ ഒന്നടങ്കം ആവേശത്തിലായി.
“സ്പീക്കർ, റൈഡിലെ അംഗമെന്ന നിലയിലുള്ള എന്റെ അവസാന ചോദ്യം എന്റെ പ്രിയതമ നതാലിയോടാണ്,” എന്ന് പറഞ്ഞ ശേഷം പോക്കറ്റിൽ നിന്നും വിവാഹമോതിരം പുറത്തെടുത്ത ലെയ്ൻ, “എന്നെ വിവാഹം കഴിക്കാമോ?” എന്ന് ചോദിച്ചു.
തുടർന്ന് സഭയിൽ കരഘോഷങ്ങളും ആർപ്പുവിളികളും ഉയർന്നു. നതാലിയുടെ അടുത്തേക്ക് നടന്ന ലെയ്ൻ അവരുടെ വിരലിൽ മോതിരം അണിയിക്കുകയും ചുംബിക്കുകയും ചെയ്തു. സഭയുടെ ഔദ്യോഗിക രേഖകളിൽ ഉൾപ്പെടുത്താനായി “അവർ ‘യെസ്’ എന്ന് മറുപടി നൽകിയതായി രേഖപ്പെടുത്താൻ ഞാൻ ആഗ്രഹിക്കുന്നു” എന്ന് അദ്ദേഹം സഭയെ അറിയിച്ചു.
പത്ത് വർഷങ്ങൾക്ക് മുൻപ് യാദൃച്ഛികമായി കണ്ടുമുട്ടിയതും പ്രതിസന്ധികളെ അതിജീവിച്ച് മുന്നോട്ട് പോയതുമായ തങ്ങളുടെ ബന്ധത്തെക്കുറിച്ച് വികാരനിർഭരമായി സംസാരിച്ച ശേഷമായിരുന്നു ലെയ്നിന്റെ വിവാഹാഭ്യർഥന. തന്റെ ജീവിതത്തിലെ എല്ലാ നന്മകളുടെയും സത്യത്തിന്റെയും ഉറവിടം നതാലിയാണെന്നും, തന്റെ ജീവിതത്തിൽ അവർ ചെലുത്തിയ സ്വാധീനം വാക്കുകളിലൂടെ പൂർണമായി പ്രകടിപ്പിക്കാൻ കഴിയാത്തതിൽ ഖേദമുണ്ടെന്നും അദ്ദേഹം പറഞ്ഞു.
ഇത്തരമൊരു വിവാഹാഭ്യർഥന താൻ ഒട്ടും പ്രതീക്ഷിച്ചിരുന്നില്ലെന്നും വളരെ അർത്ഥവത്തായ നിമിഷമായിരുന്നു അതെന്നും നതാലി പ്രതികരിച്ചു. അപ്രതീക്ഷിതമായ ഈ സംഭവത്തിന് പിന്നാലെ, 58-ാം പാർലമെന്റ് ‘പ്രണയത്തിന്റെ പാർലമെന്റ് ‘ എന്ന പേരിലായിരിക്കും അറിയപ്പെടുകയെന്ന് ന്യൂ സൗത്ത് വെയിൽസ് ലെജിസ്ലേറ്റീവ് അസംബ്ലി സ്പീക്കർ ഗ്രെഗ് പൈപ്പർ അഭിപ്രായപ്പെട്ടു.
