യാത്രക്കാർക്ക് ഇനി ഓട്ടോയിലിരുന്നും പുസ്തകങ്ങൾ വായിക്കാം! കർണാടകയിലെ മൈസൂരുവിലുള്ള ഒരു ഓട്ടോറിക്ഷ യാത്രക്കാർക്കായി ഒരു ചെറിയ ലൈബ്രറി ഒരുക്കിയ വാർത്തയാണ് സോഷ്യൽ മീഡിയിൽ ഇപ്പോൾ തരംഗമായിരിക്കുന്നത്.
ഡാനിയൽ മർഡോണ എന്ന ഓട്ടോ ഡ്രൈവറാണ് വായനാശീലം പ്രോത്സാഹിപ്പിക്കുന്നതിനായി ഈ വേറിട്ട മാതൃക നടപ്പിലാക്കിയത്. ഡ്രൈവർ സീറ്റിന് പിന്നിലായി പ്രത്യേകം തയ്യാറാക്കിയ റാക്കിൽ വിവിധ തരം പുസ്തകങ്ങൾ ക്രമീകരിച്ചിട്ടുണ്ട്. പുസ്തകങ്ങൾക്ക് പുറമെ യാത്രക്കാർക്കായി ബുക്ക്മാർക്കുകളും മധുരപലഹാരങ്ങളും ഇദ്ദേഹം നൽകാറുണ്ട്.
ലിസിയ എന്ന ഇൻസ്റ്റാഗ്രാം ഇൻഫ്ലുവൻസറാണ് ഈ ഓട്ടോയിലെ യാത്രാ അനുഭവം പങ്കുവെച്ചത്. ദശലക്ഷക്കണക്കിന് ആളുകളാണ് ഈ വീഡിയോ ഇതിനോടകം കണ്ടത്. യാത്രയ്ക്കിടയിൽ മൊബൈൽ ഫോണുകളിൽ സമയം കളയാതെ യാത്രക്കാർക്ക് അല്പസമയം വായനയ്ക്കായി
ചിലവഴിക്കാൻ അവസരമൊരുക്കുക എന്നതാണ് ഡാനിയലിന്റെ ലക്ഷ്യം.
നിലവിൽ കർണാടകയിലെ മൈസൂരുവിലാണ് ഈ ഓട്ടോ സർവീസ് നടത്തുന്നത്. ഇത്തരത്തിലുള്ള സമാനമായ ഉദ്യമങ്ങൾ മുൻപും ബെംഗളൂരുവിലും റിപ്പോർട്ട് ചെയ്യപ്പെട്ടിട്ടുണ്ട്. വായന പ്രോത്സാഹിപ്പിക്കുന്നതിനായുള്ള ഇത്തരം പ്രവർത്തനങ്ങൾക്ക് സോഷ്യൽ മീഡിയയിൽ വലിയ പിന്തുണയാണ് ലഭിക്കുന്നത്.
