കൊച്ചി: സംസ്ഥാനത്ത് മുഖ്യമന്ത്രിയുടെ ചിത്രം ഉപയോഗിച്ച് നടക്കുന്ന സൈബര് തട്ടിപ്പിനെ ജാഗ്രത പാലിക്കണമെന്ന് പോലീസ് മുന്നറിയിപ്പ്. ഫേസ്ബുക്കില് മുഖ്യമന്ത്രിയുടെ ചിത്രം ഉപയോഗിച്ച് വ്യാജ പരസ്യങ്ങള് പ്രചരിപ്പിച്ച് ‘നിങ്ങളുടെ ഫോണില് ഫോണ് പേ ആപ്പ് ഉണ്ടെങ്കില് എളുപ്പത്തില് 12,000 രൂപ സമ്പാദിക്കാം’ എന്ന തരത്തിലുള്ള സന്ദേശം നല്കി കൊണ്ടാണ് ഈ തട്ടിപ്പിന് തുടക്കം.
തട്ടിപ്പ് രീതി ഇങ്ങനെ…
മുഖ്യമന്ത്രിയുടെ ചിത്രം വ്യാജമായി ഉപയോഗിച്ച് വരുന്നതിനാല് പരസ്യത്തില് കൂടുതല് വിശ്വാസ്യത തോന്നി തട്ടിപ്പ് തിരിച്ചറിയാതെ ബട്ടണില് ക്ലിക്ക് ചെയ്യുന്നതോടെ മൊബൈല് ഫോണില് ഫോണ് പേ ആപ്പ് സ്വയം തുറക്കുന്നതായും അവിടെ 1,499 രൂപ എന്ന തുക കാണിക്കുകയും ചെയ്യും. തുക ലഭിക്കാനായി പിന് നമ്പര് നല്കുന്നതോടെ അക്കൗണ്ടില് നിന്നും പണം നഷ്ടമാകുന്നു. എന്നാല് യഥാര്ഥത്തില് അത് പണം ലഭിക്കുന്ന പേജ് അല്ല, മറിച്ച് 1,499 രൂപ നല്കാനുള്ള റിക്വസ്റ്റ് പേമെന്റ് പേജാണ് ഇത്. ഇത് മനസിലാക്കാതെ പിന് നമ്പര് നല്കുമ്പോള് തുക നേരിട്ട് തട്ടിപ്പുകാരുടെ അക്കൗണ്ടിലേക്ക് ട്രാന്സ്ഫറാകുകയാണ് ചെയ്യുന്നത്.
ശ്രദ്ധിക്കാം
സോഷ്യല് മീഡിയ പ്ലാറ്റ്ഫോമുകളില് വ്യാജ പരസ്യങ്ങള് നല്കിയുള്ള പുതിയ രീതിയിലെ ഈ സാമ്പത്തിക തട്ടിപ്പുകളില് ജാഗ്രത പാലിക്കണമെന്നാണ് സൈബര് പോലീസിന്റെ നിര്ദേശം. സോഷ്യല് മീഡിയയില് കാണുന്ന പണം സമ്പാദിക്കാനുള്ള എളുപ്പമാര്ഗം, പ്രമുഖരുടെ ചിത്രങ്ങള് അടങ്ങിയ പരസ്യങ്ങള് എന്നിവ സൈബര് തട്ടിപ്പുകളാണ്. യുപിഐ ആപ്പുകള് ഉപയോഗിക്കുമ്പോള് പിന് നല്കുന്നത് പണം സ്വീകരിക്കാനല്ല, പണം അയയ്ക്കാനാണെന്ന കാര്യവും പ്രത്യേകം ശ്രദ്ധിക്കണം.
പേമെന്റ് റിക്വസ്റ്റ് പേജുകള് ശ്രദ്ധാപൂര്വം പരിശോധിക്കുകയും സംശയാസ്പദമായ ലിങ്കുകളിലോ ബട്ടണുകളിലോ ക്ലിക്ക് ചെയ്യാതിരിക്കുകയും അരുത്. ഇത്തരത്തിലുള്ള സംശയാസ്പദമായ പരസ്യങ്ങള് കണ്ടാല് ഉടന് റിപ്പോര്ട്ട് ചെയ്യുക. സൈബര് തട്ടിപ്പിന് ഇരയായാല് ഉടന് 1930 എന്ന സൈബര് ഹെല്പ് ലൈന് നമ്പറിലോ ദേശീയ സൈബര് ക്രൈം പോര്ട്ടലായ https://cybercrime.gov.in ലൂടെയോ പരാതി നല്കുക.
സ്വന്തം ലേഖിക
