പാഞ്ഞെത്തിയ മണൽ ലോറിയിടിച്ച് സ്കൂട്ടർ തകർന്നിട്ടും, തലനാരിഴയ്ക്ക് വൻ ദുരന്തത്തിൽ നിന്ന് രക്ഷപ്പെട്ട് യുവതി. മഹാരാഷ്ട്രയിലെ ശ്രീരാംപൂർ ബേലാപൂർ റോഡിൽ നടന്ന ഞെട്ടിക്കുന്ന ഈ ദൃശ്യങ്ങൾ സിസിടിവിയിൽ പതിഞ്ഞിട്ടുണ്ട്. ലോറിയുടെ ചക്രങ്ങൾക്കടിയിൽ പെടാതെ പെൺകുട്ടി അത്ഭുതകരമായാണ് ജീവനോടെ രക്ഷപ്പെട്ടത്.
ശ്രീരാംപൂരിലെ വളവിലൂടെ അമിതവേഗതയിൽ വന്ന മണൽ ലോറി പെൺകുട്ടിയുടെ സ്കൂട്ടറിലേക്ക് ഇടിച്ചുകയറുകയായിരുന്നു. ഇടിയുടെ ആഘാതത്തിൽ സ്കൂട്ടർ റോഡിലേക്ക് മറിഞ്ഞുവീണു. ലോറിയുടെ ചക്രങ്ങൾക്കടിയിൽ പെടാൻ പോയ ആ നിമിഷത്തിൽ, പെൺകുട്ടി സമചിത്തത കൈവിടാതെ പെട്ടെന്ന് ലോറിയുടെ മുൻവശത്തെ ബമ്പറിൽ പിടിച്ചുതൂങ്ങുകയായിരുന്നു. ഈ ഒരു ചെറിയ നിമിഷത്തിലെ ഇടപെടലാണ് വൻ ദുരന്തം ഒഴിവാക്കിയത്.
എന്നാൽ അത്യാഹിതത്തിൽ നിന്ന് രക്ഷപ്പെട്ട പെൺകുട്ടിക്ക് നേരിടേണ്ടിവന്നത് മറ്റൊരു ദുരനുഭവമാണ്. റോഡരികിലേക്ക് വീണ തന്‍റെ സ്കൂട്ടർ മാറ്റാൻ ശ്രമിക്കുന്നതിനിടയിൽ, ലോറി ഡ്രൈവർ പുറത്തിറങ്ങി പെൺകുട്ടിയോട് വഴക്കിടുന്നതും ദൃശ്യങ്ങളിൽ കാണാം. പരിക്കുകളെക്കുറിച്ചോ സുരക്ഷയെക്കുറിച്ചോ അന്വേഷിക്കുന്നതിന് പകരം ഇയാൾ തർക്കത്തിൽ ഏർപ്പെടുകയായിരുന്നു.
ചുറ്റും ആളുകൾ തടിച്ചുകൂടിയതോടെ ലോറി ഡ്രൈവർ സംഭവസ്ഥലത്തുനിന്ന് ഓടിരക്ഷപ്പെടുകയായിരുന്നു. വളവുകളിൽ അശ്രദ്ധമായും അമിതവേഗതയിലും എത്തുന്ന ഭാരമേറിയ വാഹനങ്ങൾ വരുത്തിവെക്കുന്ന അപകടങ്ങളുടെ ഗൗരവം വിളിച്ചോതുന്നതാണ് ഈ ദൃശ്യങ്ങൾ. പെൺകുട്ടിയുടെ സമയോചിതമായ ഇടപെടൽ മാത്രമാണ് വലിയൊരു ദുരന്തം ഒഴിവാക്കിയത്.
