മുഹമ്മ: സിഗരറ്റ് ചോദിച്ചിട്ട് നൽകാത്തതിന്റെ പേരിൽ യുവാക്കളെ മർദിച്ചു. കലവൂരിൽ കഴിഞ്ഞ ദിവസം രാത്രി 11.30നാണ് സംഭവം. സുഹൃത്തുക്കളായ രണ്ടുപേർ സിഗരറ്റ് വലിച്ച് നിൽക്കുമ്പോൾ അപരിചിതനായ ഒരാൾ സിഗരറ്റ് ചോദിച്ച് അടുത്തു വന്നു. യുവാക്കൾ സിഗരറ്റ് കൊടുക്കാൻ തയാറായില്ല. തുടർന്ന് അപരിചിതൻ ബലമായി സിഗരറ്റ് എടുത്ത് നടന്നു.
അപരിചിതന്റെ പിന്നാലെ പോയി സിഗരറ്റ് തിരികെ ചോദിച്ചപ്പോൾ അജ്ഞാത രായ മൂവർസംഘം യുവാവിന്റെ മുഖത്ത് പെപ്പർ സ്പ്രേ അടിച്ച ശേഷം മർദിക്കുകയായിരുന്നു. കൂടെയുണ്ടായിരുന്ന സുഹൃത്തിനും ഇരുമ്പുവടി കൊണ്ടുള്ള അടിയേറ്റു.
5000 രൂപയും മർദനത്തിനിടെ നഷ്ടപ്പെട്ടു. സംഭവവുമായി ബന്ധപ്പെട്ട് മാരാരിക്കുളം മുറിക്കൽ വീട്ടിൽ വിമൽ ബാബുവിനെ മണ്ണഞ്ചേരി പോലീസ് അറസ്റ്റ് ചെയ്തു.
