ന്യൂ ഓർലിയൻസ്: അമേരിക്കയിലെ ന്യൂ ഓർലിയൻസിൽ മിസിസിപ്പി നദിയിൽ വൻ കപ്പൽ അപകടം. യാത്രക്കാരുമായി സഞ്ചരിച്ചിരുന്ന റിവർ ക്രൂസ് ബോട്ടിലേക്ക് നിയന്ത്രണം നഷ്ടപ്പെട്ട ടാങ്കർ കപ്പൽ ഇടിച്ചുകയറി. 180 മുതൽ 190 വരെ യാത്രക്കാർ കപ്പലിൽ ഉണ്ടാ‍യിരുന്നു. അപകടത്തെ തുടർന്ന് ക്രൂസ് ബോട്ട് ഒരു വശത്തേക്ക് ചരിഞ്ഞു. ഇതോടെ യാത്രക്കാർക്കിടയിൽ വലിയ പരിഭ്രാന്തി. ജീവൻ രക്ഷിക്കാനായി നിരവധി പേർ ലൈഫ് ജാക്കറ്റുകളണിഞ്ഞ് നദിയിലേക്ക് ചാടിയതായാണ് പുറത്തുവരുന്ന ദൃശ്യങ്ങൾ വ്യക്തമാക്കുന്നത്.
ന്യൂ ഓർലിയൻസ് തുറമുഖത്ത് ഉച്ചയ്ക്ക് 12.30ഓടെയായിരുന്നു അപകടം. ‘അറ്റ്ലാന്‍റിക് അസ്ഫാൾട്ട്’ എന്ന ടാങ്കർ കപ്പലാണ് അമേരിക്കൻ ക്രൂസ് ലൈൻസിന്‍റെ ‘സിറ്റി ഓഫ് ന്യൂ ഓർലിയൻസ്’ എന്ന യാത്രാക്കപ്പലിൽ ഇടിച്ചത്. ടാങ്കറിന്‍റെ നിയന്ത്രണം നഷ്ടപ്പെട്ടതാണ് അപകടത്തിന് കാരണമായതെന്ന് ന്യൂ ഓർലിയൻസ് മേയർ ഹെലീന മൊറേനോ അറിയിച്ചു.
അപകടത്തിന്‍റെ ദൃശ്യങ്ങൾ ഇതിനോടകം സമൂഹമാധ്യമങ്ങളിൽ വ്യാപകമായി പ്രചരിക്കുകയാണ്. കപ്പൽ ഒരു വശത്തേക്ക് ചരിയുന്നതും യാത്രക്കാർ പരിഭ്രാന്തരായി വെള്ളത്തിലേക്ക് ഇറങ്ങുന്നതും ദൃശ്യങ്ങളിൽ കാണാം. ജീവൻ പണയപ്പെടുത്തി രക്ഷപ്പെടാൻ ശ്രമിക്കുന്ന യാത്രക്കാരുടെ ദൃശ്യങ്ങൾ വലിയ ആശങ്കയാണ് സൃഷ്ടിക്കുന്നത്.
